Esirtki satyp esirgender

Qyzylordalyq quqyq qorǵaýshylardyń nazaryna gazetke oralǵan dúnıeni áldekimge satyp jatqan azamat­tyń áreketi sezikti kórinedi. Teksere kele, gazetke oralǵan zattan ózindik ıisi bar untaq sekildi nárse tabylady. Álgi ony 2 myń teńgege satyp tur eken. Sodan jańaǵy zatty quqyq qorǵaý organ­darynyń qyzmetkerleri tárkileıdi. Tárki­lengen zatqa tıisti saraptama taǵaıyndalyp, nátı­jes­inde birinen 3,31 gramdy jáne ekinshisinen 4,0 gramdy quraıtyn «keptirilgen marıhýana» shyqqan. Ustalǵan azamattyń úıin tekserý barysynda taǵy 1 jarym kılogramǵa jýyq esirtki zaty tabyldy. Ony kúdikti úı aýlasyndaǵy jertólege polıetılen paketke orap tyǵyp qoıǵan. Zatqa saraptama taǵaıyndalyp, jalpy salmaǵy 1 kılo 260 gramm «keptirilgen marıhýana» ekendigi anyqtalǵan. Qazirgi tańda oǵan qatysty qylmystyq is qozǵaldy. Kúdikti Syrdarııa aýdandyq ishki ister bóliminiń ýaqytsha ustaý abaqtasyna qamaýǵa alyndy. Tıisti sotqa deıingi tergep-tekserý amaldary júrgizilip, basqa da qylmystarǵa qatystylyǵy anyqtalýda. Dál osyndaı fakt 16 aqpan kúni de tirkelgen. Esirtki zatyn saýdalap turǵan jerinen 1968 jyly týǵan Besaryq aýylynyń turǵyny ustaldy. Oqıǵa ornynan aıǵaq zat retinde 2 dana gazet qıyndysyna oralǵan jasyl tústi ózine tán ıisi bar zat alyndy. Belgisiz zatqa saraptama taǵaıyndalyp, 5,39 gramm jáne 5,83 gramm quraıtyn «keptirilgen marıhýana» ekendigi anyqtaldy. Ol da qamaýda otyr. QYZYLORDA