Qostanaı oblysynyń joǵary oqý oryndary rektorlary men Memlekettik qyzmet jáne sybaılastyqqa qarsy is-qımyl agenttigi aýmaqtyq departamentiniń bastyǵy memorandýmǵa qol qoıdy. Oǵan 8 joǵary oqý ornynyń basshylary men oqytýshylary, stýdentter qatysty. Onda sóılegender joǵary oqý oryndarynda oqıtyn stýdentter arasynda sybaılastyqqa «noldik» tózimdilik bolýdy qalyptastyrý úshin basty pármendi túsindirý jáne tárbıelik jumystarǵa salý kerektigin aıtty.
«Siz ben bizdiń basty maqsatymyz—sybaılas jemqorlyq jastar arasynda qylmyspen teń uıat nárse bolyp qabyldanýyn qalyptastyrý bolyp tabylady. Bilim alý—qyzmet túri, ol úshin memleket nemese stýdenttiń ata-anasy qarjy tóleıdi. Sondyqtan professorlyq-oqytýshylyq quram men stýdentter jastardyń sapaly bilim alýy kerektigin túsinýi tıis. Oqytýshy stýdentke aqyly negizde sapaly bilim usynatynyn túsinýi kerek. Al sybaılastyq oryn alǵan kezde onyń zalaly eń aldymen bilim alyp jatqan stýdentke tıedi.Sybaılastyq oryn aldy degenshe stýdenttiń bilim sapasy birden nasharlaıdy» dedi Qostanaı memlekettik pedagogıkalyq ınstıtýtynyń rektory, professor Erkin Ábil. Ol stýdentterdi sybaılastyq oryn alǵanda úndemeı qalmaýǵa, tózbeýge shaqyrdy.
Departament pen oqý oryndarynyń basshylary memorandým sheńberinde sybaılastyqqa qarsy jastar fleshmoby, sarapshylar klýbyn qurý sekildi túrli sharalardy da josparlaýǵa kelisti. Departament tek joǵarý oqý oryndarymen ǵana emes, jalpy bilim salasynda sybaılastyqqa qarsy jumys júrgizetin bolady.
«Bilim basqarmasymen kelise otyryp, oblystaǵy jalpy bilim beretin barlyq mektepterde «Adal urpaq» patrıottyq klýbtaryn qurý týraly jumystar júrgizildi. 2016 jyly oblystaǵy 529 mekteptiń 417-de osyndaı klýb quryldy. Balany jastan adaldyqqa úıretýge klýbtardyń qosar úlesi bolady dep bilemiz» dedi Memlekettik qyzmet jáne sybaılas jemqorlyqqa qarsy is-qımyl departamentiniń bastyǵy Berik Bekjanov.
Departament pen joǵary oqý oryndary arasyndaǵy qol qoıylǵan memorandým qoǵamdyq keselge qarsy olardyń kúsh birktirýine múmkindik jasaıdy.
Názıra Járimbetova
«Egemen Qazaqstan»
