Nysan aldaǵy shilde aıynda paıdalanýǵa beriledi jáne elordadaǵy jalǵyz jabyq akvapark bolady dep kútilýde. Saýyq keshenine túrli attraksıondary bar sý parki, sheshiný bólmeleri, monshalar men demalys jáne tamaqtaný oryndary ornatylady.
Ǵımarattyń jalpy aýdany 8,5 myń sharshy metr. Sý parkiniń birinshi qabatynda qaýipsizdik deńgeıi joǵary jeti tóbeshik pen eki basseın bolady. Sýdyń temperatýrasy 32 gradýstan joǵary bolmaıdy. Basseınniń birine jobalaýshylardyń usynysymen tolqyn áserin týdyratyn qondyrǵy ornatý josparlanyp otyr. Bul demalýshylarǵa teńizdiń tolqynyn sezinýge múmkindik beredi. Meımandarǵa jaıly bolýy úshin park aýmaǵyna jyly edender men klımat baqylaý qyzmeti ornatylady. Ekinshi qabatynda SPA aımaqtar, monshalar men haýyzdardyń birneshe túri ashylady.
Budan bólek parktiń aınalasynda aǵysy shamaly jáne qatty «jalqaý ózender» jasaý kózdelgen. Parkte bir mezgilde 1,5 myń adam demala alady. «Múmkindigi shekteýli azamattar parkke kelip ýaqytyn jaıly ótkize alady. Olarǵa arnap ekinshi qabatqa esh qıyndyqsyz kóterilýi úshin jedelsaty ornattyq», - dedi merdiger kompanııanyń ókili medıa ortalyqtyń tilshisine.
