Kórmeni Mádenıet jáne sport mınıstri Arystanbek Muhamedıuly ashty. EKSPO qarsańynda ótkizilip otyrǵan alǵashqy mádenı sharanyń Erbolat Tólepbaıdyń kórmesi bolǵany óte qýanyshty jaıt. Búginde sýretshini dúnıe júzindegi ónersúıer qaýym tanıdy, baǵalaıdy. Issaparmen shet elderde bolǵanymda sýretshiniń kartınalarynyń álemdegi eń myqty galereıalarda turǵanyn kórdim. Bul biz úshin maqtanysh», dedi mınıstr. Al, Syrtqy ister mınıstri Qaırat Ábdrahmanov, akademık Myrzataı Joldasbekov, Senat depýtaty Birǵanym Áıtimovalar sýretshiniń óneri týraly óz oılarymen bólisti.
E.Tólepbaıdyń týyndylary Qazaqstan, TMD elderi, Eýropa, Amerıka jáne Azııa elderiniń mýzeılerinde, galereıalarynda saqtaýly. Álemniń qyryqtan asa elinde jeke kórmesin ótkizgen sýretshiniń elordadaǵy «Bes kún» atty kórmesi de ózindik ereksheligimen daralandy. Kórme ne úshin «Bes kún» ataldy? Nege ony anasyna arnady? Qoltańbasynyń ózgesheligimen, boıaýynyń aıqyndyǵymen erekshelenetin sýretshiniń dúnıege, tirshilikke, adamı qarym-qatynastarǵa degen kózqarasyna anasynyń yqpaly zor bolǵan sııaqty. Sýretshi bylaı deıdi: «Anam marqum ómir boıy emshilikpen aınalysty. Uldar edi esimi. Ol kezde biz balamyz. Kúnde tańerteń uıqydan turyp, tańerteńgi sháıdi isheıik desek, úıde keminde 10-15 beıtanys kisi otyrady. Biz otbasy bolyp ońasha sháı iship kórmeppiz. Anam aıtatyn adamdar arasyndaǵy qarym-qatynas, jaryq dúnıe men o dúnıe týraly áńgimeler qulaǵymda qalyp qoıypty. О́z ishki dúnıem men ózgelerdiń, jalpy túrli-túrli adamdardyń ishki dúnıesin salystyrý qasıeti bala kúnimnen qalyptasty. Kórmedegi jumystarym osy taqyryptyń aınalasynda».
Kórmeni tamashalaý barysynda óner ıesiniń áıeldiń ómirdegi mıssııasyn erekshe sezimtaldyqpen, pálsapashyldyqpen boıaý tiline kóshirgenine tánti boldyq. Ol beınelegen keıipkerlerdiń barlyǵy da túrli-túrli kóńil-kúımen ózine baýraıdy. Bir sýrettegi ana, ekinshi bir sýrettegi kelin, úshinshi bir «Aspanǵa ushý» atty sýrettegi jas boıjetken, «Renish», «Úmit», «Ajyrasý» ne «Alǵashqy mahabbat», «Jas jubaılar» atty kartınalardaǵy keıipkerlerdiń barlyǵy da sezimtal, sergek, ómirge qushtar beıneler. Bes kún jalǵandaǵy shynaıylyq pen izgiliktiń naq ózindeı áser qaldyrady.
Sýretshiniń aıtýynsha, bul ómirde tragedııa joq. Tabıǵat álemi de, jan-janýarlar, ań-qustar álemi de sondaı úılesimdi, keremet. Al adamdar astamshylyq jasaıdy, kúnáǵa batady. «Adamdardaǵy izgilikti oıatý úshin tek din adamdary ǵana emes, óner adamdary da eńbek etse, biz keleshegimizdi jaqsartamyz ǵoı dep oılaımyn. Qazaqtyń óneri ózge elderdiń eshqaısysynyń da ónerinen kem emes», deıdi sýretshi. Jalpy, kórmege jıylǵan jurtshylyq Erbolat Tólepbaıdyń shynaıy oı-tolǵamdaryna da, týyndylaryna da rızashylyq tanytqanyna kýá boldyq.
Kórmeden alǵan áserimen Májilis depýtaty Saýytbek Abdrahmanov bylaısha bólisti:
– Kórmeniń atynyń ózi kóp-kóp oıǵa qaldyrady. Abaıdyń «Ýaıym – er qorǵany, esi barlyq. Qıyny bul dúnıeniń – qoly tarlyq. «Ehe-ehege» elirme bozbalalar, Bul bes kúndik bir maıdan er synarlyq» degen sózi bar. Erbolattyń anasy da ulyna: «Bul bes kúndik dúnıe, ótedi de shyǵady», dep aıtyp otyrady eken. Sýretshi kórmesi osy bes kúndik (aptaǵa da tolmaıtyn!) dúnıeniń san syryn san qyrynan aıqara ashyp berýimen júrek tolqytady.
Aıgúl Seıilova,
«Egemen Qazaqstan»
Sýretterdi túsirgen
Erlan Omarov,
«Egemen Qazaqstan»
