Uly Jibek jolynyń jańa paraǵy ashyldy
Qazaqstan astanasynda ótken ShYU-ǵa múshe memleketter basshylary keńesiniń keńeıtilgen otyrysynda Úndistan men Pákistan resmı túrde ShYU músheligine qabyldanyp, uıym álem halqynyń 40%-nyń, dúnıe júzi ekonomıkasynyń 30%-yn ıelengen birlestikke aınalyp úlgerdi.
Sammıtti uıymdastyrýshy ári tóraǵalyq etýshi eldiń basshysy retinde Qazaqstan Respýblıkasynyń Prezıdenti Nursultan Nazarbaev uıymnyń búginge deıingi atqarǵan jumysyna joǵary baǵa bere kelip, jańadan qabyldanǵan Úndistan men Pákistannyń premer-mınıstrlerin múshelikke qabyldanýymen quttyqtady.
Shanhaı yntymaqtastyq uıymy aıasyndaǵy múshe memleketterdiń ózara saýda-ekonomıkalyq qatynastary Uly Jibek jolyn jańǵyrtý ıdeıasyn ilgeriletip otyr. 25 jyldyq tarıhy bar Qazaqstan men Qytaıdyń dıplomatııalyq qatynasy jyl sanap artyp keledi. Batys Eýropa – Batys Qytaı avtojolynyń bıyldan bastap kommersııalyq paıdalanýǵa berilip, Qytaı taýarynyń Qazaqstan men Reseı arqyly Batys Eýropa elderine jete bastaǵany anyq.
Osy oraıda, uıymǵa múshe Qyrǵyzstan Prezıdenti Almazbek Atambaev ShYU elderiniń jahandyq ekonomıkadaǵy mańyzy tranzıttik áleýetine de baılanysty ekenin aıta kelip, Qyrǵyzstan men О́zbekstan arqyly da tasymal naryǵyn qurý kerektigine nazar aýdardy. Atambaevtyń pikirinshe, sońǵy jyldary Qyrǵyz Respýblıkasynda qolǵa alynǵan ınfraqurylymdyq jobalar men О́zbekstannyń syrtqy ekonomıkaǵa ashyla bastaýy Qytaıdyń «Bir beldeý – bir jol» baǵdarlamasymen úndeseri anyq.
ShYU elderiniń ekonomıkalyq áleýeti
Shanhaı yntymaqtastyq uıymy qurylǵaly beri uıym elderiniń ózara tıimdi ekonomıkalyq jáne saýda qatynastarynyń ornaýyna muryndyq bolyp júrgen Qazaqstan Prezıdenti Nursultan Nazarbaev bıyldan bastap segiz eldiń basyn biriktirip otyrǵan alpaýyt uıym elderiniń ózara erkin saýda aımaǵyn qurý kerektigin aıtty.
Ekonomıkalyq damý úshin ortaq naryq pen ekonomıkalyq ıntegrasııany basshylyqqa alatyn Qazaqstannyń bul jolǵy bastamasy Qazaqstan-Qytaı saýda qatynasynyń eki el ishinde ǵana emes, jalpy Eýrazııa keńistiginde arta túsýin maqsat etetini anyq.
«О́zara saýda kóleminiń artýy bolashaqta ShYU-nyń erkin saýda aımaǵyn qurýǵa septigin tıgizetini anyq. Bul jerde bizdiń elimiz ekonomıkalyq ózara is-qımyl salasyndaǵy ózderin qyzyqtyratyn jobalardy zerdeleýdi bastaý arqyly kezeń-kezeńimen ilgerileı alady. Munan bólek, bizdiń qyzmetimizdiń mańyzdy vektory mádenı-gýmanıtarlyq yntymaqtastyq sanalady. Bul turǵyda ShYU ýnıversıtetin qurý jáne jumysyn jolǵa qoıý týraly kelisimge qol qoıýdy qoldaımyz», – degen Qazaqstan Prezıdenti ShYU-ǵa múshe memleketterdiń 2017-2018 jyldarǵa arnalǵan týrızm salasyndaǵy yntymaqtastyq baǵdarlamasyn uıymdastyrýdaǵy birlesken is-qımyl josparyn qabyldaý atalǵan saladaǵy ózara is-qımylǵa tyń serpin beretindigin atap ótti.
О́z kezeginde Qyrǵyzstan Prezıdenti Almazbek Atambaev ShYU Damý bankin ashý kerektigin aıtty. «Biz saýda-ekonomıkalyq yntymaqtastyqtyń belsendiligin qoldaımyz. Sondyqtan ShYU Damý bankin qurý máselesi týyp otyr. Qyrǵyzstan da ShYU-ny qurýshylardyń biri boldy. Sol sebepti atalǵan bank Bishkek qalasynda ornalasýy kerek degen sheshimdi usynyp otyrmyz», – dedi A.Atambaev.
Daıyndaǵan
Baýyrjan MUQANOV,
«Egemen Qazaqstan»
