Saltanatty sharaǵa Bas prokýrordyń orynbasary Ǵabıt Sadyrbekov, Densaýlyq saqtaý vıse-mınıstri Tımýr Muratov, memlekettik organdardyń ókilderi, medısına salasynyń ardagerleri men óńir dárigerleri qatysty.
Saltanatty jıynda oblys ákimi jınalǵandardy quttyqtap, jańa nysannyń óńir úshin mańyzdylyǵyna toqtaldy.
«Áleýmettik nysan Memleket basshysy Qasym Jomart Toqaevtyń tapsyrmasyna sáıkes, Bas prokýratýra qaıtarǵan aktıvter esebinen jáne Densaýlyq saqtaý mınıstrliginiń qoldaýymen salyndy. Bul – Mańǵystaý jurtshylyǵy úshin úlken qýanysh. Jańa ǵımarat jedel medısınalyq kómektiń qoljetimdiligin arttyryp, turǵyndarǵa sapaly ári ýaqtyly qyzmet kórsetýge múmkindik beredi. Aq halatty jandardyń qajyrly eńbegi árdaıym qurmetke laıyq. Jańa nysan sizderdiń jumystaryńyzdy jeńildetip, kásibı múmkindikterińizdi keńeıtedi dep senemin», dedi Nurdáýlet Qılybaı.
Zamanaýı stansııa jylyna 100 myń shaqyrtýǵa qyzmet kórsetýge arnalǵan. Ǵımarat ortalyqtandyrylǵan birikken dıspetcherlik qyzmetpen, sımýlıasııalyq jáne oqý-praktıkalyq ortalyqpen, sondaı-aq 20 sanıtarlyq avtokólikke arnalǵan jyly garajben jabdyqtalǵan.
Sonymen qatar 2025 jyly Mańǵystaý oblysy ákimdiginiń qoldaýymen oblystyq jedel medısınalyq járdem stansııasyna zamanaýı medısınalyq jabdyqtarmen qamtylǵan 32 sanıtarlyq avtokólik satyp alyndy. Budan bólek «NCOC» kompanııasynyń demeýshilik qoldaýy aıasynda qosymsha 20 sanıtarlyq avtokólik alyndy. Bul qoldaý óńir turǵyndaryna kórsetiletin medısınalyq kómektiń qoljetimdiligi men sapasyn arttyrýǵa múmkindik beredi.
Bul nysan biregeıligi jaǵynan Astana qalasynan keıingi ekinshi stansııa. Aldaǵy ýaqytta elimizdiń barlyq óńirinde osyndaı úlgidegi medısınalyq mekemeler salý josparlanyp otyr. Bul nysannyń basty ereksheligi – munda dárigerlerdiń sapaly jumys isteýi úshin qajetti barlyq jaǵdaı jasalǵan.
