Bıyl 125 jyldyq mereıtoıyn atap ótip jatqan teatr elimizdegi eń kóne mádenı oshaqtardyń biri sanalady. Ujym ókilderiniń aıtýynsha, ulttyq mártebe berý týraly sheshim teatr tarıhyndaǵy mańyzdy ári tarıhı oqıǵa boldy.
Teatr dırektory Ǵanı Kárimov Prezıdenttiń bul sheshimi ujym úshin úlken mártebe ári zor jaýapkershilik ekenin atap ótti. Onyń sózinshe, bul teatr qyzmetkerleriniń uzaq jyldar boıǵy eńbegi men shyǵarmashylyq izdenisteriniń joǵary baǵalanǵanyn kórsetedi.
Prezıdent tapsyrmasy: Qyzylordada jańa drama teatry men zamanaýı kitaphana boı kóteredi
Búginde teatr qazaq dramatýrgııasynyń úzdik týyndylaryn orys tilinde sahnalap, ulttyq mádenıetti nasıhattaýǵa úles qosyp keledi. Repertýarynda «Shyńǵys han», «Han Kene», «Tomırıs – saq patshaıymy», «Álııa», «Sáken Seıfýllın» sekildi tarıhı tulǵalar men ulttyq qundylyqtardy dáripteıtin qoıylymdar bar.
Sonymen qatar teatr Qazaqstan mádenıetin halyqaralyq deńgeıde tanytyp keledi. Ujym SAMGAU festıvaliniń Gran-prı júldesin jeńip alǵan, «Reseıdegi kezdesýler» jáne «Altyn Vıtıaz» festıvalderine qatysqan. Teatr Serbııa, Qytaı, Ispanııa jáne Vengrııa elderinde gastroldik saparlar jasap, sheteldik kórermenderdi qazaqstandyq teatr ónerimen tanystyrdy. 2023 jyly teatr UMAI ulttyq syılyǵynyń «Úzdik dramalyq spektakl» atalymynda jeńimpaz atandy.
Almatydaǵy teatrlardyń birine Asanáli Áshimovtiń esimi berildi
Teatr basshylyǵynyń pikirinshe, ulttyq mártebe shyǵarmashylyq múmkindikterdi keńeıtip, halyqaralyq áriptestikti nyǵaıtýǵa jol ashady. Bolashaqta teatr qazaqstandyq dramatýrgtermen yntymaqtastyqty kúsheıtip, jas talanttardy qoldaýǵa jáne qoıylymdardyń sapasyn arttyrýǵa basymdyq bermek. Sondaı-aq halyqaralyq mádenı baılanystardy damytý jáne teatrdyń tehnıkalyq bazasyn jańǵyrtý jumystary jalǵasady.
