Lıýksembýrgtiń premer-mınıstri Ksave Bettel óz sózinde Qazaqstanmen aradaǵy qarym-qatynastardy nyǵaıta túsýge múddeli ekenin jetkizdi.
– Men Astanaǵa osymen ekinshi ret kelip otyrmyn. Osy qalada Lıýksembýrg Uly Gersogtigi konsýldyǵynyń ashylǵanyna qýanyshtymyn. Bul bizdiń elimiz úshin de, Qazaqstan úshin de mańyzdy oqıǵa dep oılaımyn. Astanaǵa alǵash kelgennen bergi aralyqta Qazaqstan týraly kóp málimetke qanyqtym. Qazaqstanda kóptegen ult ókilderi, din ókilderi turatynyn bildim, san qıly mádenıetterdiń shoǵyrlanǵan jeri ekenin túsindim. Qazaqstan Táýelsizdik alǵannan beri álem elderimen dıplomatııalyq qatynas ornatýǵa daıyn ekenin kórsetti. Astanada ashylǵan konsýldyq Qazaqstan-Lıýksembýrg arasyndaǵy baılanystardy odan ári keńeıte túsýge yqpal etedi dep senemin,– dedi Ksave Bettel.
Qazaqstan men Lıýksembýrg arasynda dıplomatııalyq baılanystar ornaǵanyna bıyl 25 jyl tolatynyn aıta ketý kerek. Sodan bergi aralyqta saýda-ekonomıkalyq, mádenı-gýmanıtarlyq baǵyttarda baılanys jolǵa qoıylǵan.
Astanadaǵy basqosýda sóz alǵan Lıýksembýrgtiń Qazaqstandaǵy Tótenshe jáne ókiletti elshisi Jan-Klod Knebeler:
– Búgingi jıynǵa eki eldiń ekonomıkasy men ishki qaýipsizdigine jaýapty laýazymdy tulǵalardyń qatysqany ashylý rásiminiń qanshalyqty mańyzdy ekenin kórsetedi. О́z basym bul konsýldyqqa jıi kelip, eldiń túrli qurylymdarynyń ókilderimen jıi kezdesip turýǵa tyrysamyn. Biz bul jerde ortaq bastamalar men jobalardy iske asyratyn bolamyz,– dedi.
О́tken jyldyń qorytyndysy boıynsha eki el arasyndaǵy saýda aınalymy 60 paıyzǵa ósip, 18 mln dollardan asqanyn aıtyp ótken jón. Lıýksembýrg Qazaqstanǵa negizinen kólik quraldaryn, elektr-tehnıkalyq jabdyqtar, toqyma matalary men metall eksporttaıdy.
Arnur ASQAR,
«Egemen Qazaqstan»
