– Káne, kim buryn jep taýysady eken?! Jarysaıyq! – dedim qaryndasyma qarap.
Ádette, neden de bolsa, menen qalmaýǵa tyrysatyn ol birden basyn ızep, kelise ketti de, qolyndaǵy top-tompaq qyzanaqty apyl-ǵupyl jeýge kiristi. Qyp-qyzyl sýy pyrs-s etip shashyrap, áp-ádemi kóıleginiń omyraýyn búldirse de, qaramady. Al men bolsam, oǵan kózimniń astymen qýlana qarap qoıyp, ýysymdaǵy qyzanaqty óp-ótirik maljańdap jegen bolamyn.
– Me... men jep boldym, – dedi ol bir kezde asa mańyzdy sharýa bitirgendeı aýzyn alaqanymen súrtip qoıyp.
Manadan beri osy sátti ǵana kútip turǵan men:
– Mine, qara! – dep ýysymdaǵy búp-bútin qyzanaqty jylt etkizip shyǵara qoıdym.
Onyń kózi baǵjań ete qaldy. Mende bir óshi ketkendeı qatty baqyryp jylap jiberdi. Sodan soń qansha jubatsaq ta ókpesi basylmaı, óksip-óksip, qaıta-qaıta kóz jasyn tóge berdi.
Ákem taǵy da bir qyzanaq úzip ákelip edi, basyn shaıqap, almaımyn dep, odan saıyn daýsyn údete tústi.
«Nege?», deımin-aý!..
Sóıtse-em, ol ómirinde birinshi ret ádiletsizdik kórip tur eken ǵoı!..
Nurǵalı ORAZ,
«Egemen Qazaqstan»
