30 qazanda Qyrǵyzstanda prezıdenttik saılaý bolyp ótkeni belgili. Onda negizgi tartys Almazbek Atambaev, Adahan Madýmarov jáne Qamshybek Tashıev arasynda júretin bolady dep boljanǵan edi. Saılaý daýys berý úderisteriniń shyn máninde osylaı órbigenin kórsetti.
Nátıjesinde eldiń is basyndaǵy premer-mınıstri Almazbek Atambaev eń kóp daýys jınap, basqa qarsylastarynan moıny ozyq keldi. Bıýlletenderdiń 95 paıyzy sanalǵan kezde ony saılaýshylardyń 62,95 paıyzy qoldaǵany belgili boldy. Madýmarov – 14,92, al Tashıev 14,42 paıyz ǵana daýys jınady. Qalǵan kandıdattar 1 paıyzdyq mólsherdi de baǵyndyra almady.
Jaǵdaıdy retteý josparyn usyndy
Arab memleketteriniń lıgasy (AML) Sırııa prezıdenti Bashar Asadqa eldegi janjaldy sheshý josparyn joldady. Bul jáıt Katar astanasy Doha qalasynda 3 saǵatqa sozylǵan kelissózden keıin málimdeldi. Basqosýǵa AML syrtqy ister mınıstrleri men Sırııanyń resmı delegasııasy qatysty.
Katar premer-mınıstri – syrtqy ister mınıstri sheıh Hamad bın Jasım ál-Tanıdiń habarlaǵanyndaı, jospar B.Asadtyń Sırııadaǵy adam qurbandyǵy men zorlyq-zombylyqtyń kez kelgen túrin boldyrmaýdyń belgili bir naqty qadamyn qarastyrady. Eger jospar qabyldanatyn bolsa, onda Sırııada basqa elderdegi, ıaǵnı Lıvııadaǵy sııaqty oqıǵalar qaıtalanbaıdy.
Parsy shyǵanaǵyna qatysýyn ulǵaıtady
AQSh óziniń áskerin Iraktan áketkennen keıin jalpy Parsy shyǵanaǵyndaǵy óziniń qatysýyn ulǵaıtýdy josparlap otyr. Qurama Shtattar qosymsha áskerlerin Kýveıtte ornalastyrady dep kútilýde. Sóıtip, olar Iraktaǵy jaǵdaıdy osy jerden baqylap otyrmaq.
Iranmen janjal týyndaǵan jaǵdaıda da Kýveıtten jedel is-qımyl tanytýǵa múmkindik bar kórinedi. Al áskerdiń sany týraly másele jaqyn kúnderde aıaqtalatyn kelissózderden keıin belgili bolmaq. Oǵan qosa, prezıdent Barak Obamanyń ákimshiligi Parsy shyǵanaǵyndaǵy halyqaralyq sýlarǵa jańa korablder jiberý máselesin qarastyryp jatsa kerek. AQSh áskerleri Iraktan jyl sońyna deıin tolyq shyǵarylýy tıis.
Serb ultshyly bir jarym jylǵa kesildi
Serbııa radıkaldy partııasynyń (SRP) serkesi Voıslav Sheshel burynǵy Iýgoslavııa boıynsha halyqaralyq trıbýnalmen (BIýHT) sotqa qurmet tanytpaǵany úshin bir jarym jylǵa kesildi. Jalpy, Sheshel 2003 jyldan beri qamaýda otyr.
Oǵan áskerı qylmys jasady, ıaǵnı Iýgoslavııa soǵysy kezinde adam óltirdi, azaptady, qonys aýdarýǵa májbúrledi degen aıyptar taǵylǵan bolatyn. Biraq ol ózine qatysty aıyptardan bas tartyp keledi. Shesheldiń advokatynyń aıtýynsha, is 2003 jyldan bergi kezeńdi aıtpaǵannyń ózinde, 2010 jyldan beri de bir adym ilgeri jyljymaǵan.
Somalıdiń Djılıb qalasyna soqqy berdi
Kenııanyń áskerı-áýe kúshteri Somalıdiń Djılıb qalasyna soqqy berdi. Jergilikti turǵyndardyń sózderine qaraǵanda, bombalaýdyń saldarynan 12 adam qurban bolsa, olardyń altaýy sábı. 52 adam túrli dene jaraqattaryn alǵan. Avıasoqqynyń bireýi «Ál-Shabab» ıslam jasaǵynyń bazasyna, ekinshisi sol mańda ornalasqan bosqyndar lagerine jasalǵan.
Qazan aıynyń ortasynda Kenııa Somalıge osyndaǵy ekstremısterge qarsy tolyq aýqymdy operasııa bastaý úshin ásker kirgizgen bolatyn. Al ózge el shekarasynan ótýge Kenııa aýmaǵynan jıi-jıi adamdardyń urlanýy men shekara aımaǵyndaǵy Kenııa áskerılerine shabýyldar jasaý sebep bolǵan edi. Kenııa basshylyǵy ázirshe operasııanyń qashan aıaqtalatynyn naqtylamaı otyr.
Jer sharynyń 7 mıllıardynshy turǵyny
Reseıdiń Kalınıngrad qalasynda keshe Jer sharynyń jeti mıllıardynshy turǵyny jaryq dúnıe esigin ashty, dep habarlady jergilikti Klops.Ru basylymy. Petr Alekseevıch Nıkolaev Máskeý ýaqytymen túngi 12-den 2 mınót ótkende týsa kerek.
Jalpy, Jerdiń jeti mıllıardynshy turǵynynyń týý datasy kóp jaǵdaıda shartty. Al týra osy qalanyń turǵyny jeti mıllıardynshy bolatyny týraly sheshimdi BUU qabyldaǵan edi. 1 sekóntte dúnıe júzi boıynsha myńdaǵan bala ómirge keletinin eskersek, shyn máninde kimniń dál jeti mıllıardynshy ekenin dóp basyp aıtý múmkin bolmaıtyny taǵy anyq.
Qysqa qaıyryp aıtqanda:
*Túrik qutqarýshylary jer silkinisinen qıraǵan úıler úıindilerinen tiri qalǵan adamdardy izdestirýdi toqtatty. 30 qazanǵa deıingi derek boıynsha, zilzaladan opat bolǵandar sany 596 adamǵa jetti. *Bolgarııadaǵy prezıdenttik saılaýdyń ekinshi týrynda bıleýshi «Azamattar Bolgarııanyń eýropalyq damýy úshin» partııasynan kandıdat Rosen Plevnelıev jeńiske jetti. Ol saılaýshylardyń 54 paıyz daýysyn jınaǵan. *Lıvııanyń qaza tapqan basshysy Mýammar Kaddafıdiń uly Saadı Kanada, Avstralııa, Jańa Zelandııa, Irak jáne Reseı oqqaǵarlar komandasynyń kúzetimen qupııa túrde Nıgerge ótken eken. Qazir ol baı da eńseli vıllada turyp jatqan kórinedi. *Máskeýdiń Tver soty «Sanrash» kompanııasynyń aryzyn qaraıtyn boldy. Sóıtse, belgili satırık Mıhaıl Jvaneskıı kommýnaldyq tólemderge surapyl qaryz eken. Ol jylýǵa, sýǵa, elektr jaryǵyna jáne lıft qyzmetine 2006 jyldan beri kók tıyn tólemepti. Qaryzy 377,9 myń rýblge (1 890 000 teńge) jetken. *Iemenniń astanasy Sana qalasynda ornalasqan avıasııa bazasynda 4 márte jarylys jasalǵan. Osy oqıǵalardan keıin el bıligi Sananyń halyqaralyq áýejaıyn jabý týraly sheshim qabyldady. О́ıtkeni, áýejaı bazaǵa tıip tur eken.Internet materıaldary negizinde ázirlendi.
