Osy oqıǵaǵa oraı ótken saltanatty rásimde «Astana EKSPO-2017» UK» AQ basqarma tóraǵasy Ahmetjan Esimov sóz sóılep, aldaǵy ýaqytta qolǵa alynatyn sharýalardyń mán-jaıyn málimdedi. Onyń sózine qaraǵanda, qazirgi ýaqytta kórmege qatysqan shet memleketter óz ekspozısııalarynda demontajdaý jumystaryn aıaqtaý ústinde.
«Kóptegen kórmelerdiń nysandary shara aıaqtalǵan soń kommersııalyq alańǵa aınalady nemese taratylady. Máselen, Mılanda ótken sońǵy kórmede solaı boldy. Bizdiń de pavılonymyz ol kórmege qoıyldy, keıin jınap alyndy. Oǵan deıin bolǵan EKSPO kórmeleriniń nysandary kommersııalyq ortalyqtarǵa berildi. Prezıdenttiń ıdeıasy – kórme perspektıvaǵa baǵyttalýy kerek. Bul – bolashaqqa salynǵan ınvestısııa, kapıtaldy damytý joly. Prezıdenttiń salıqaly tujyrymdamasynyń tıimdiligin nysandardy qoldaný sheshimi kórsetip otyr», dedi A.Esimov.
Jańa jyldan bastap EKSPO-2017 qalashyǵyndaǵy pavılondarda kúrdeli jóndeý jumystary bastalady eken. «S-3», «S-4» pavılondarynda «Astana» halyqaralyq qarjy ortalyǵy ornalaspaq. «C-1» pavılonynda bilim berý ortalyǵy qurylady. Ulttyq kompanııa basshysy atap ótkendeı, bul ortalyqtyń negizgi ıdeıasy erte jastan bastap bolashaq mamandardyń múmkindikteri men áleýetin anyqtaý jáne damytý bolmaq. «Mundaı qyzmet kórsetý nysandary qazirdiń ózinde damyǵan elderde jumys isteıdi. Balanyń erte jasynan qandaı kásipke ıkemdi ekeni anyqtalady, bul qadam bolashaqta tabysty bolýy múmkin. Ortalyq bilim berýdegi jahandyq úrdisti qoldanýǵa, ómirdi qanaǵattandyrýǵa baǵyttalǵan. Bul bizdiń óńirdegi osyndaı alǵashqy ortalyq bolady. Qazirgi ýaqytta onyń tujyrymdamasy Nazarbaev Ýnıversıtetimen birlesip ázirlenýde», dedi A.Esimov.
Jıynda belgili bolǵandaı,
«C-2» pavılonynda kórme kesheni ornalasady. Ol túrli kórmelerge, halyqaralyq jáne otandyq ekspozısııalarǵa arnalǵan alań bolady. «О́ńirler men memleketter ózderiniń jetistikterin kórsetip, tájirıbelerimen únemi bólise almaq. Qazir dızaınerlik tapsyrmany ázirleý jumystary júrgizilýde. Bul jumysqa «Atameken» ulttyq kásipkerler palatasy tartylyp otyr», dedi ulttyq kompanııanyń basqarma tóraǵasy. Onyń aıtýynsha, korporatıvtik pavılonnyń negizinde IT-startaptardyń halyqaralyq tehnoparki qurylady. Ol baǵyttaǵy jumys Aqparat jáne kommýnıkasııalar mınıstrligimen birlesip júrgizilmek. «Kommýnıkasııa ortalyǵy jetekshi BAQ-tyń lokasııasy bolady. Ol alań EKSPO kórmesi kezinde óte yńǵaıly ınfraqurylymdyq alań retinde ózin kórsete bildi», deıdi Ahmetjan Esimov.
Kórmeniń týrıstik aýmaǵynyń ashylý saltanatynda Astana qalasynyń ákimi Áset Isekeshev halyqaralyq sharadan keıin elordanyń qalaı ózgergenin áńgimeledi. «EKSPO-2017 kórmesiniń strategııalyq jobasynyń arqasynda Astana qalasy óte kórkem kelbetke ıe boldy. Halyqaralyq kórme elimizdiń «jasyl» tehnologııalarǵa degen erekshe qyzyǵýshylyǵyn kórsetti. Qazaqstan eýrazııalyq aýmaqta qaýipsiz ári jyldam damyp kele jatqan memleket retinde ımıdjin jaqsarta tústi. Al Astana elimizdiń eń isker ári qarjylyq ortalyǵyna aınaldy. Kórme nysandarynyń aldaǵy ýaqytta da el ıgiligine jaraıtyny, atap aıtqanda Halyqaralyq qarjy ortalyǵy, IT-startaptar tehnoparki, «jasyl» tehnologııalardy damytý boıynsha halyqaralyq ortalyqtyń ashylatyny qýantady», degen qala basshysy IT-tehnoparktiń ashylýy bizdiń ǵalymdarǵa, bıznesmender men jas mamandarǵa ózderiniń ınnovasııalyq jobalaryn iske asyrýǵa múmkindik beretinin aıtty.
«Nur Álem» Astananyń jańa kórikti ornyna aınalyp, EKSPO-2017 kórmesiniń basty týrıstik murasy bolyp qaldy. Elimizdiń bas shyrshasy jáne eń iri muz qalashyǵy «Nur Álemniń» mańynda salynatyny týraly sheshim qabyldandy», dedi ákim. Ol sonymen qatar EKSPO-2017 ashylǵaly beri oǵan 4 mln adam kelgenin, bul Astana úshin mańyzdy kórsetkish ekenin aıryqsha jetkizdi.
«ShYU jáne TMD elderi arasyndaǵy is-sharalardyń reıtınginde Astana osy birlestikterdiń TOP-5 qalalarynyń qataryna endi. Infraqurylymdyq jobalar júzege asyrylyp, jańa áýejaı men temir jol vokzaly irge qalady. 11 kóshe ashyldy. 50 shaqyrymnan astam jylý jelisi men 25 shaqyrym elektr jelisi salyndy. Qalada qonaqúılerdiń sany artty. Eger 2016 jyly olardyń sany 165 bolsa, bıyl qonaqúılerdiń sany 200-den asty. Elordada júzdegen jańa meıramhanalar men dámhanalar ashyldy. EKSPO-nyń bastalýyna deıin 2 myńnan astam beınebaqylaý kameralary ornatylyp, bul jumys qalada qylmys deńgeıin tómendetýge múmkindik berdi. Máselen, 2017 jyldyń 8 aıy ishinde tirkelgen qylmystardyń sany shamamen 20 paıyzǵa tómendegen. Jyl sońyna deıin qalada 13 myń kamera ornatylatyn bolady», dedi Astana ákimi.
Saltanatty rásim kórkemónerpazdar qatysqan merekelik konsertpen jalǵasty.
Ashat RAIQUL,
«Egemen Qazaqstan»
