«Qazaqstan negizinen munaı, metall men metall ónimderin, hımııalyq ónimder, aýyl sharýashylyǵy azyq-túligin eksporttaýda. Al Fransııadan memleketimiz elektrondy jáne mehanıkalyq jabdyqtar, tutynýshylyq taýarlar, dári-dármek pen kosmetıka, avtokólikter, taǵam ónimderi men qurylys materıaldaryn ımporttaıdy. Fransııanyń Qazaqstan ekonomıkasyna 2005 jyldan bastap 2016 jyldyń jartysyna deıin quıǵan qarjysy 12,7 mlrd dollardy qurady. Bizdiń elimizde fransýz kapıtaly bar 135 kásiporyn jumys isteýde. Olardyń arasynda «Total», «Areva», «Danon», «Vıkat», «Pejo», «Alstom» jáne basqa da kompanııalar bar», dedi oblys ákimi Janseıit Túımebaev júzdesý barysynda.
Fransýz elshisi Fılıpp Martıne OQO men Fransııa aımaqtary arasyndaǵy ózara tıimdi saýda-ekonomıkalyq, ınvestısııalyq, sondaı-aq mádenı-gýmanıtarlyq áriptestikti damytýdyń áleýeti zor ekenin aıtty.
«Eki el arasyndaǵy iskerlik qarym-qatynasty odan ári damytý maqsatynda bizdiń aımaqtar arasynda ımport jáne eksport kóp salalardy anyqtaý baǵytynda birge jumys jasaýdy usynamyn. Sol salalar boıynsha birikken jańa óndiris oryndaryn ashýǵa bolady dep oılaımyn. Biz ózara áriptestigimizdi uzaq merzimge jalǵastyrýǵa senemiz», dedi ol.
Fransııa búgingi tańda damyǵan ındýstrıaldy-agrarly el sanalady. Bul el óndiristik ónerkásip kólemi boıynsha álemde aldyńǵy qatarda keledi. Máselen, óńdeý ónerkásibiniń mashına jasaý, avtokólik jasaý, elektr-tehnıkalyq jáne elektrondy óndiris, avıasııa, keme jáne stanoktar jasaý sekildi salalary jaqsy damyǵan. Sondaı-aq Fransııa álemdegi eń iri hımııalyq jáne munaı hımııalyq ónimder, qara jáne tústi metall shyǵarýshy memlekettiń biri sanalady.
Budan keıin eki tarap Muhtar Áýezov atyndaǵy Ońtústik Qazaqstan memlekettik ýnıversıtetinde «Fransýz Alıansynyń» ashylý saltanatyna qatysty. Atalǵan uıym álemde 1883 jyldan beri jumys jasaıdy. 800-den astam ókildigi bar. Osy arqyly fransýz tili men dástúrin, mádenıetin nasıhattap keledi.
Aıtýly jıynǵa Parıjdegi «Fransýz Alıansy» qorynyń ókili Bekker hanym arnaıy keldi.
Mamandardyń aıtýynsha, eki el arasyndaǵy mádenı-ádebı baılanystary men lıngvıstıkalyq jáne ǵylymı qarym-qatynasty nyǵaıtýǵa bul Alıanstyń yqpaly jaqsy bolady dep kútilýde.
Baqtııar TAIJAN,
«Egemen Qazaqstan»
Ońtústik Qazaqstan oblysy
