Akademııa qonaqtary Parlamenttegi áleýmettik-mádenı damý komıtetiniń jumysymen tanystyrýdy jáne Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýyna baılanysty túsindirme jumystaryn júrgizýdi maqsat tutqan kezdesý barysynda sondaı-aq, Joldaýdaǵy kólik-logıstıka ınfraqurylymynyń tıimdiligin arttyrýǵa, jańǵyrý negizi – adamı kapıtalǵa jáne jemqorlyqpen kúreske qatysty bólimderi saraptaldy.
«21 jyldan beri jyl saıyn halyqqa jol tartyp kele jatqan Joldaýlardyń elimiz damýyndaǵy úlesi aıryqsha ekenin bilesizder. Qysqa jáne uzaq merzimdi strategııalyq josparlar men máselelerdi sheshýde, júzege asyrýda Elbasymyzdyń Joldaýdaǵy ár sózi aıryqsha mańyzǵa ıe bolyp, qoǵamnyń damý tetigine aınalyp jatqany aqıqat. 1997 jyldan bergi jyl saıynǵy joldaýynda Elbasymyz úkimet pen qarapaıym halyq aldyna naqty maqsattar qoıyp, sodan týyndaıtyn mindetterdi júzege asyrý joldaryn kórsetip keledi. Elbasynyń ár joldaýy – bolashaqqa baǵdar. Bolashaqty baǵdarlap, ekonomıkalyq jáne mádenı damýdyń basty baǵyttaryn naqtylaý úshin Elbasy joldaýlarynyń mańyzy zor», – dedi QR Parlamenti Májilisiniń depýtaty Beıbit Baımaǵambetuly óz sózinde.
Qazaq kólik jáne kommýnıkasııalar akademııasynyń rektory B. Qýanyshev, akademııa kafedralarynyń meńgerýshileri M. Qulgeldınov, A. Molǵajdarov, D. Eskendirova oqý ordasyna arnaıy at basyn tiregen halyq qalaýlylaryna joǵary bilim berý salasyna qatysty birqatar mańyzdy saýaldaryn qoıa otyryp, atalmysh akademııadaǵy kóliktik-logıstıkalyq keshendi damytý, júk qozǵalysyn durystap uıymdastyrý, kedergisiz júk jáne jolaýshy tasymaly, taǵy da basqa salany tereńdep oqytatyn «Qozǵalysty jáne tasymaldy uıymdastyrý logıstıka» mamandyǵyn jańa ádistermen oqytý, zerthanalardy jáne oqý-tájıirbelik dáristerdiń sanyn kóbeıtý máselesi jaıly tyń oı-pikirlerin ortaǵa saldy.
«Basty kapıtal – adam resýrstary» degen qaǵıdattan shyǵa otyryp, bolashaq temir jol jáne avtokólik mamandaryn daıyndaý barysynda akademııada tárbıe jáne oqý-ǵylymı jumystaryna da keńinen kóńil bólinýde. «Rýhanı jańǵyrý» baǵdarlamasyn júzege asyrý barysynda jasalynyp jatqan is-sharalar osynyń aıǵaǵy. Turaqsyz álemdik ekonomıka men qarjy qıynshylyǵy kezinde joldaýda aıtylǵan irgeli máselelerdi sheshý, tek Úkimet aldyndaǵy ǵana emes, jastarǵa bilim berip, tárbıelep otyrǵan joǵarǵy oqý oryndarynyń da basty mindet bolyp tabylady», – dep atap ótti oqý ornynyń basshysy Baqytjan Muhanbetuly.
Kezdesýdi qorytyndylaı kele, qonaqtar akademııa qabyrǵasynda Parlamenttegi Áleýmettik-mádenı damý komıtetiniń keńeıtilgen otyrysyn ótkizip, oqý ornymen yntymaqtastyqty odan ary damytýǵa sheshim qabyldady.
Mıra Baıbek,
«Egemen Qazaqstan»
ALMATY
