Ýkraınanyń ónerkásipti úlken qalalarynyń biri Dnepropetrovsk kósheleriniń birindegi qoqys jáshigine jarylǵysh zat jasyrylǵan. Eshteńemen sharýasy joq, kóshede ketip bara jatqan zardap shegýshi onyń ishine bos shıshany laqtyryp qalǵanda, jarylǵysh zat iske qosylyp, sonyń saldarynan ol sol jerde kóz jumǵan.
Oblystyq prokýratýra bul qylmysty isti aldymen «qasaqana kisi óltirý» degen qylmystyq bapqa jatqyzǵan edi. Biraq qosymsha málimetter jınalǵan soń «terrorızm» babyna jatqyzyp otyr. Qazir osy bappen qylmystyq is qozǵaldy. Sóıtip, terrorıster Ýkraına qalalaryna da jete bastaǵan syńaıly.
Aq úıge de dáldep oq atyldy
AQSh-tyń Aq úıine qarsy da oq atyldy. Onyń terezesine tıgen oq «Kalashnıkov» avtomatynan shyqqan degen boljam bar. Ol oq ótkizbeıtin terezege shaǵylyp, jerge túsken. Al ekinshi oq úıdiń qabyrǵasyna qadalypty.
Bul ýaqytta Aq úıdiń qojaıyny Barak Obama Kalıfornııa shtatynda basketbol jarysyn tamashalap otyrǵan eken. AQSh-tyń arnaýly qyzmetteri oqıǵanyń sebepkerlerin tabýǵa qyzý kirisip ketti. Biraq olar juma kúni Vashıngtonda bolǵan atysty bul oqıǵamen sabaqtastyrmaı otyr. Ol joly da Aq úıdiń mańynda oq atylyp, artynan sol mańnan ishinde «Kalashnıkov» avtomaty jatqan ıesiz «Honda» kóligi tabylǵan bolatyn.
Tún tynyshtyǵyn tiledi
Aýǵanstan prezıdenti Hamıd Karzaı óz elinde beıbitshilik mıssııasymen júrgen AQSh pen NATO áskerleriniń túngi reıdterine úzildi-kesildi qarsylyq bildirip otyr. О́ıtkeni, túngi joryqtardan keıin birneshe beıbit turǵyn qazaǵa ushyraıdy eken.
Hamıd Karzaı AQSh pen NATO áskerlerin 2014 jylǵa deıin el aýmaǵynda qaldyrýdyń negizgi sharty osy bolady dep jarııalady keshe ashylǵan Loı Jyrǵada. Al NATO áskerleri, kerisinshe, túngi joryqtardyń ókimetke narazylyqpen bas kóterýshilerge qarsy tıimdi áreketter ekenin aıtýda. Biraq túngi joryqtar kezindegi tintýler men qorqytýlar turǵyndardyń narazylyǵyn týdyratyny prezıdentti qatty mazalaıtyny aıqyn ańǵarylady.
«Isi bilmes, kisisi bilerdiń» keri
Qylmysty iske baılanysty jaýap berýge kelmegen «Inteko» fırmasynyń ıesi Elena Batýrınaǵa Máskeý soty suǵyn qatty qadap otyr. Endi kelmese, ol kúsh qoldaný arqyly jetkizilýi múmkin degen habar taratyldy. Al onyń jubaıy Iý.Lýjkov bul istiń saıası astary bar ekenin aıtýda.
Jýyrda ǵana Máskeýge kelgen boıynda Iý.Lýjkov tutqyndalý múmkindigine baılanysty zaıybyna shet elden qaıtpaýdy qatty tapsyrǵanyn BAQ-qa ashyq aıtqan bolatyn. Is «Bank Moskvanyń» 2009 jyly qala bıliginen qosymsha emıssııaǵa dep bólgen ulan-asyr qarajatqa E.Batýrınanyń jerin alýyna baılanysty bolyp otyr. Qujat júzinde bári de durys jasalǵan bul istiń jeke bastyń paıdasyn kózdegeni, árıne, beseneden belgili.
«Eýro-2012»-de oınaıtyndar anyqtaldy
Fýtboldan Eýropanyń kezekti chempıonatyna qatysatyn komandalar túpkilikti anyqtaldy. Bul Horvatııa men Túrkııa komandalarynyń jaýapty kezdesýi 0:0 esebimen aıaqtalǵannan keıin belgili boldy.
Sóıtip, birinshi kárzeńkede: Ýkraına, Polsha, Ispanııa, Gollandııa; 2-de Germanııa, Italııa, Anglııa, Reseı; 3-de Horvatııa, Grekııa, Shvesııa, Portýgalııa; 4-de Danııa, Fransııa, Chehııa, Irlandııa oınaıtyn boldy. О́kinishke qaraı, túrik komandasy chempıonatqa qatysa almaı qaldy.
Aǵaıynǵa artyqshylyq joq
Ýkraına men Reseı arasyndaǵy gaz problemasy áli aıaqtalar emes. Reseı premer-mınıstriniń baspasóz hatshysy Dmıtrıı Peskov bul iste jańa kelisimge kelý múmkindigi bar dep jarııalady.
Al Ýkraına premer-mınıstri N.Azarovtyń adamdary jańa baǵaǵa qol jetkizsek, 6 mlrd. AQSh dollary shamasynda aqsha únemdeımiz dep jarııalap úlgerdi. Biraq Reseı jaǵy barlyq jeńildikterdi Ýkraınanyń Keden odaǵyna kirýimen baılanystyrǵysy keledi. Ýkraına bolsa, óziniń ulttyq múddesine qarsy dep bul máselege aıaq basar emes. Búgingi kúni Kıevke jóneltiletin 1 myń tekshe metr gazdyń baǵasy 446 dollar, al Germanııaǵa bosatylatyn osynsha gaz 436 dollar bolyp otyr.
Qysqa qaıyryp aıtqanda:
*Reseı áýejaıynyń bıýrokrat qyzmetkerleri ózge emes ózderiniń eń jaqyn aǵaıyny, tanylmaǵan «Prıdnestrove» adamdaryna da tize batyrýda. Tanylmaǵan respýblıka basshylary áýejaıda zańsyz ustalǵan óz sheneýnikterin bosatýdy talap etip, nota jasaýǵa májbúr boldy. *Nıý-Iork bırjasyndaǵy munaıdyń jeltoqsan aıyna jasalǵan aldyn-ala baǵamy bir barrelge 98 dollardan asyp tústi. Bul – kútilgen baǵadan aıtarlyqtaı joǵary. *Túrkimenstan úkimeti ózderiniń munaı-gaz qory 71,2 mlrd. shartty tonnaǵa jetkenin jarııalady. Osydan bes jyl buryn ol 45,5 mlrd. tonna bolǵan edi. *Ázerbaıjan óziniń áskerı áleýetin Qytaı qarýymen arttyrýdy kózdep otyr. Ol jýyrda Qytaı men Pákstan birlesip shyǵarǵan joıǵysh ushaqtar satyp alý jóninde shart jasasqan.Internet materıaldary negizinde ázirlendi.
