Marapatqa usynyldy

Elimizdiń polısııa qyzmetker­leri qyl­myskerlerdi ustaýda jan aıamaı qyzmet istep, óz mindetterin adal atqaryp keledi. Oǵan qazir dálel kóp. Birqatary qyl­mys­kerlerdi ustaýda erlikpen qaza tapty. Soǵan oraı qarý­lanǵan qylmyskerdi qolǵa túsirý kezinde qaısarlyq pen batyrlyq tanytqany úshin Jambyl ob­lysy IID-niń 7 qyzmetkerin, onyń ishinde úsheýin (marqum bolǵan) Qa­zaqstan Respýblıka­synyń memlekettik nagradalary­men marapattaý týraly usynym­hat jiberildi, deıdi IIM resmı ókili N.Oraz. Qyz­mettik mindetterin oryn­daý kezinde qaısarlyq pen batyrlyq kór­setkeni úshin Almaty qalasynyń IID patrýldik polısııa polkiniń 2 qyz­metkeri (marqum bolǵan) memlekettik nagradaǵa usynyldy. Ústimizdegi jyldyń 10 aıy ishinde IIO-nyń 71 qyzmetkeri qaza bol­ǵan, onyń ishinde 18 qyzmet­ker – qyzmettik mindetin oryn­daý kezinde, 9 qyzmetker  – qyl­mys­kerlerdi qolǵa túsirý kezinde. Jyldyń basynan bastap IIO-nyń 15 qyzmetkeri, onyń ishinde ekeýi (marqum bolǵan) memlekettik nagradalarmen marapattaldy. Sonymen birge Ishki ister mınıstrligi ishki ister organ­dary­nyń barlyq aýmaqtyq bóli­nis­terine Tarazda jáne Almatyda qaza bolǵan polısııa qyzmetker­leriniń otba­syna, sondaı-aq jara­lanǵandardy emdeý úshin ma­terıaldyq kómek kórsetý týraly hat joldaǵan. Ishki ister organ­darynyń jeke quramy qaza tapqan qyzmetkerlerdiń otbasy­laryna kómek kórsetý retinde bir kúndik jalaqylaryn aýdar­maq­shy. Buǵan qosa, qyzmettik mindetin oryndaý kezinde qaza bolǵan qyzmetkerlerdiń otbasy­la­ryna jerleý úshin 3 aılyq aqshalaı qara­jat, al alty aı ótkennen keıin (muragerlik quqyǵy kúshine engen soń) 60 aılyq qarajat bó­linedi. Jaraqat alǵan qyzmet­ker­lerge olardy ońaltý úshin jár­demaqy bólinedi, deıdi resmı ókil. Al elimizde ótken apta ishinde ǵana 3448 qylmys tirkelip, «izi sýymaı» 2042 qyl­mys jáne buryn jasalǵan 581 qylmys, onyń ishinde ótken jyldar sa­natyndaǵy 19 qylmys ashylǵan. Izdeý jarııalanǵan 88 qyl­mys­ker izdestirilip, tabylyp, 5 qarý tár­kilengen. Esirtkiniń zańsyz aı­naly­myna baılanysty 42 qyl­mys anyqtaldy, onyń ishinde  18 satý faktisi. 8,5 keliden asa esirtki zaty alyndy. Má­selen, Almaty oblysynyń polıseıleri Talǵar qalasy­nyń turǵyny 34 jastaǵy kelinshekti óltirý qylmysyn ashty. Pyshaq jaraqaty bar onyń máıiti  qa­rasha aıynda páterinde ta­bylǵan edi. Jedel-izdestirý is-sharalary barysynda qylmysty paıdaqorlyq maq­sat­ta jasaǵan 27 jáne 30 jastaǵy eki tur­ǵyn qolǵa tústi. Olar jasyryn já­bir­lený­shiniń úıine kirip, ur­lyq jasap jatqanda jábirlenýshi uı­qy­synan oıanyp ketken. Kúdik­tiler kelinshekti óltirip, oqıǵa orny­nan boı tasalap úlgirgen. Sol sııaqty Almaty qalasynda qazan aıynyń ortasynda turǵyn úıdiń birinde zorlyq-zombylyq belgileri bar 56 jastaǵy jergilikti áıel adamnyń máıiti tabylǵan bola­tyn. Arnaıy jáne jedel-izdestirý is-sharalaryn ót­kizý bary­synda 48 jastaǵy jergilikti tur­ǵyn ustaldy. Qylmystyń oryn alýyna ishimdik ishý saldarynan jábirlenýshi men kúdiktiniń ara­synda shyq­qan urys-keris túrtki bolǵan. Qyl­mystyń izin jasyrý úshin kú­dikti máıitti úıdiń jertólesine jasyryp tastaǵan. Aleksandr TASBOLATOV.