Qazaqstan Respýblıkasy Ekonomıkalyq yntymaqtastyq jáne damý uıymynyń komıtetterindegi baıqaýshy mártebesin alýǵa ótinishiniń tusaýkeserin ótkizdi
Keshe Parıjge jumys saparynyń aıasynda Qazaqstan Respýblıkasynyń Premer-Mınıstri Kárim Másimov Ekonomıkalyq yntymaqtastyq jáne damý uıymy (EYDU) keńesiniń otyrysyna qatysty, dep habarlady Qazaqstan Premer-Mınıstriniń baspasóz qyzmeti.
EYDU keńesiniń otyrysynda sóz sóılegen Kárim Másimov Qazaqstan Respýblıkasynyń uıym komıtetterindegi baıqaýshy mártebesin alýǵa ótinishiniń tusaýkeserin ótkizdi.
Kárim Másimov óziniń sózinde elimizdiń EYDU standarttaryn engizýge jáne uıym komıtetterimen ári qaraı yntymaqtasýǵa degen talpynysyn jetkizdi.
«Jarty ǵasyr buryn, EYDU qurylǵan kezde, Qazaqstannyń ýaqyt óte kele atalǵan Uıymǵa ótinish beretinin eshkim bilgen joq. Tipti 20 jyl buryn da, bizdiń elimiz táýelsizdik alǵan kezde, mundaı shamshyldyq senimsiz kóriner edi», – dep atap kórsetti K.Másimov.
Qazaqstan Premer-Mınıstri «sońǵy 20 jyldyń jeńil bolmaǵanyn», biraq búginde Prezıdent N.Nazarbaevtyń jetekshiligimen úlken jetistikterge qol jetkizilgenin kóldeneń tartty.
«Bizdiń budan bylaı jańa ıdeıalar men ınvestısııalarǵa ekonomıkamyz ashyq. Azamattarymyzdyń baı áleýetin barynsha paıdalaný úshin zamanaýı ınfraqurylymdy jáne joǵary bilikti bilimi bar ártaraptandyrylǵan jáne ınnovasııalyq ekonomıka qurylysyna ınvestısııa salýdamyz», – dedi Qazaqstan Premer-Mınıstri óz sózinde.
«Búgingi tańda bizdiń jekemenshik sektorymyzda shaǵyn jáne orta bıznestiń 700 000-ǵa jýyq kásiporny 2,5 mln. adamdy jumyspen qamtyp otyr. TMD elderiniń ishinen tek Reseı ǵana jan basyna shaqqanda eń kóp syrtqy ınvestısııa tarta alǵan. Sondaı-aq elimizge tartylǵan 136 mlrd. dollar ınvestısııanyń jartysy sońǵy tórt jyldyń úlesine tıedi, bul mańyzdy jáıt», – dep atap kórsetti Kárim Másimov.
Sońǵy jıyrma jylda Qazaqstan ekonomıkalyq ósimin saqtady, ishki jalpy ónimdi jan basyna shaqqanda 12 esege arttyrdy – 700 AQSh dollarynan 9 000 AQSh dollaryna deıin jetkizdi. Sońǵy 10 jylda elimiz ekonomıkasy tez damyǵan álem elderiniń ondyǵyna kirdi jáne qazir Dúnıejúzilik banktiń jiktelimi boıynsha biz tabysy ortasha deńgeıdegi el bolyp tabylamyz.
«Bizdiń ekonomıkamyz álemdegi tez damýshy ekonomıkalardyń biri bolyp tabylady, onyń ortasha ósimi jylyna 8% quraıdy», – dedi Qazaqstan Premer-Mınıstri óz sózinde.
Kárim Másimov uıymǵa qatysýshy elderdiń ókilderin Qazaqstan Úkimetiniń EYDU-men yntymaqtastyǵy týraly habardar etti. Bilim berýdi jańǵyrtýdyń memlekettik saıasatynda sarapshylardyń usynys-keńesteri eskerildi. Qazir Qazaqstanda qolǵa alynyp otyrǵan ınvestorlarǵa arnalǵan «bir tereze» qaǵıdasy da EYDU-nyń úzdik tájirıbesine negizdelgen.
Qazirgi tańda EYDU-men seriktestikte jekemenshik sektordyń, ulttyq ekonomıkanyń básekege qabilettiligin damytý, memlekettik organdardyń ashyqtyǵyn jáne esep berýshiligin arttyrý, sybaılas jemqorlyqty jáne onyń sebepterin eńserý jónindegi jumystar jalǵasýda.
Mańyzdysy sol, Qazaqstan Respýblıkasy EYDU-nyń básekege qabilettiliginiń Eýrazııalyq baǵdarlamasyna múshe bolyp tabylady.
«Jarty ǵasyr buryn, EYDU qurylǵan kezde, Qazaqstannyń táýelsiz el bolatynyn eshkim bilgen joq. Júıeli túrde jańǵyrtý úrdisin júrgizgen Qazaqstannyń ekonomıkasy jedel damyǵan álemniń úzdik on eliniń qatarynan kórinetinin de eshkim bilgen joq. Biz Qazaqstan ókili Ekonomıkalyq yntymaqtastyq jáne damý uıymynyń baıqaýshylary qataryna qosylatyn kúndi asyǵa kútemiz», – dedi Kárim Másimov.
Sóz reti kelgende, EYDU-nyń álemniń Ulybrıtanııa, AQSh, Kanada, Shveısarııa jáne t.b. eń damyǵan 34 memleketiniń basyn qosyp otyrǵan uıym ekenin, álemdik ishki jalpy ónimniń 60%-y uıymǵa múshe memleketterdiń úlesine tıetinin aıta keteıik.
