Shahar basshysy Marat Tasmaǵanbetov pen Qytaıdyń Hýbeı provınsııasynan kelgen delegasııa arasynda osyndaı ýaǵdalastyq jasaldy. Meımandarǵa óńirimizdiń ınvestısııalyq áleýeti jaıly jan-jaqty maǵlumat berildi. Qos tarap tarapynan júzege asyrylatyn birikken jobalar talqylanyp, oı-pikirler almasyldy.
«Turaqty ekonomıkalyq ósimdi qalyptastyrý úshin sheteldik ınvestorlarmen áriptestik ornatýdyń mańyzy zor. Bul týraly Elbasymyz Nursultan Nazarbaev únemi aıtyp keledi. Osy baǵytta óńirimizde atqarylyp jatqan jumystar az emes. Qazirgi ýaqytta Germanııa, Shvesııa, Reseı elderinen ınvestısııa tartý máseleleri boıynsha aýqymdy jobalar tartylady. Petropavl qalasy óndiristik, mádenı ortalyq bolyp sanalady. Ekonomıkanyń basym bóligin óndiristik oryndar quraıdy. Tórt júzden astam kásiporyn jumys isteıdi», dedi Marat Imanbaıuly.
Shııan qalasy halyqtyq úkimetiniń vıse-meri Chjao Chje óz sózinde Qazaqstan men Qytaı arasyndaǵy dostyq, iskerlik qarym-qatynastyń, ózara áripteptestik baılanystyń nyǵaıyp kele jatqanyn atap kórsetti. Senimdi tranzıttik dáliz sanalatyn Petropavl qalasynyń qarjy quıýǵa qolaıly óńirge, iri kólik-logıstıkalyq ortalyqqa aınalatynyna senim bildirdi.
Onyń aıtýynsha Qazaqstannyń «Nurly jol, Qytaıdyń «Bir beldeý, bir jol» baǵdarlamalary aıasynda ózara áriptestiktiń artýyna qolaıly geografııalyq ahýal jaqsy jumys istep keledi.
Kezdesý barysynda sóz alǵan «SQO SP KAZ» JShS-iniń bas menedjeri Azat Shaıkenov bolashaq ındýstrııalyq parkte josparlanyp otyrǵan sharalarmen tanystyrdy. Munda arnaıy tehnıkanyń 50-den astam túri shyǵarylady. Olardyń qatarynda traktor, suıyqtyq tasymaldaıtyn júk kólikteri, medısınalyq maqsatta paıdalanylatyn tehnıkalar bar. Jeli júıeleri Aspanasty elinen jetkizilmek. Mamandar elimizdiń jáne Qytaıdyń joǵary oqý oryndarynda daıarlanady. Indýstrııalyq park tolyq qýatyna kóshken kezde 4 myń jańa jumys orny qurylady. Joba quny 65 mıllıard teńgeni quraıdi. Qazirgi tańda zaýytqa 165 gektar jer telimi bólingen.
Qytaı ınvestorlary qant shyǵaratyn, kartop krahmalyn óndiretin zaýyttar salý jónindegi usynystardy qarastyrýǵa ýáde berdi.
О́mir ESQALI,
«Egemen Qazaqstan»
Soltústik Qazaqstan
