Qazaqstan Qarýly Kúshteriniń Joǵarǵy Bas Qolbasshysy Nursultan Nazarbaev «Qarýly Kúshterimiz bes qarýy saı zamanaýı úlgidegi aıbyndy armııaǵa aınaldy. Saıypqyran sarbazdarymyz búginde Uly dalanyń senimdi qyrany, azamattyǵymyzdyń almas aldaspany», dep baǵalaǵan qazaq áskeriniń biliktiligi halyqaralyq sharada jan-jaqty synalýda.
Elimizdiń aýmaǵynda halyqaralyq armııa oıyndary sheńberinde «Artıllerııalyq oq atý sheberleri» baıqaýy, ushqyshsyz ushý apparattary esep toptarynyń «Suńqar ańshylyǵy» jáne áskerı baılanysshylardyń múldem jańa saıys túri – «Senimdi qabyldaý» saıysy ótip jatyr. Bizdegi oıyndarǵa barlyǵy 12 memleketten, atap aıtqanda, Ázerbaıjan, Belarýs, Venesýela, Zımbabve, Iran, Qazaqstan, Qytaı, Qyrǵyzstan, Reseı, Tájikstan, О́zbekstan men Sırııadan 18 komanda qatysýda.
Aıtýly sharanyń Qazaqstan aýmaǵynda ótetin kezeńiniń «Otar» 40-shy áskerı bazasyndaǵy ashylý saltanatynda sol kezdegi Qorǵanys mınıstri, general-polkovnık Sáken Jasuzaqovtyń: «Armııalyq saıys barysynda álemniń ártúrli elderiniń áskerı mamandary oqý-jattyǵý polıgondarynda jaýyngerlik mashyqtaryn pash etedi, al tankterdiń, avıasııa men teńiz korablderiniń atysy tek oqý nysanalaryna baǵyttalady. Armııa halyqaralyq oıyndaryndaǵy saıys – bul nysanalardy joıýdaǵy dáldikti, ártúrli qarýdy sheber meńgerý, úlgili sporttyq daıyndyq pen tózimdilik, jańǵyrtylǵan áskerı tehnıkany basqarýdaǵy daǵdy men sheberlikti kórsetý ǵana emes, sonymen birge baǵa jetpes tájirıbe bolyp tabylady», – deýi beker emes.
О́ıtkeni bıyl qazaqstandyq áskerı qyzmetshiler oıyn aıasyndaǵy 28 konkýrstyń 14-ne qatysady. Onyń ústine 2017 jylǵy Armııa oıyndarynyń qorytyndysy boıynsha Qazaqstan Respýblıkasy Qarýly Kúshteriniń qurama komandasy álemniń 28 elinen kelgen 150 komandanyń ishinde jalpykomandalyq esep boıynsha úshinshi orynǵa turaqtaǵan bolatyn. Uıymdastyrýshylar sol joly Qazaqstan komandasynyń qatysýshylaryn eń kóp ári belsendi ujym retinde baǵalady. Al halyqaralyq oıyndardyń tóreshiler alqasy qazaqstandyq jaýyngerlerdiń joǵary daıyndyǵy men kásibıligin jáne biliktiligin erekshe atap ótti.
Armenııada tirkelgen alǵashqy jeńis
Halyqaralyq armııa oıyndarynyń Armenııa Respýblıkasynda ótken «Dostastyq jaýyngeri» baıqaýynda qazaqstandyq áskerı qyzmetshiler top jardy.
Bul saıysqa Armenııa, Belarýs, Grekııa, Iran, Qazaqstan jáne Reseı áskerıleri qatysqan bolatyn. Baıqaý aıasyndaǵy «Kásipqoı», «Mergen» jáne «Kavaler/hansha» estradalyq-kórkemdik kezeńi boıynsha bizdiń sportshylar joǵary nátıjeler kórsetti.
Úsh kezeńdik saıys qorytyndysy boıynsha qarsylastarynan oq boıy oza shaýyp, eń joǵary upaı jınaǵan serjant Seıitkárim Nurseıitqoja «Dostastyq jaýyngeri» ataǵyna ıe boldy.
– Mundaı dodalarǵa birneshe márte qatyssam da bıylǵydaı básekelestikti buryn-sońdy kórgen joqpyn. Bıyl qatysýshylar sany artty jáne olardyń daıyndyq deńgeıi anaǵurlym joǵary boldy. Jeńiske umtylǵan komandalardyń qaı-qaısysy da aıanyp qalǵan joq», – deıdi saıys jeńimpazy.
Bul dodada Qazaqstan áskeriniń taǵy bir ókili kishi serjant Ertilek Bekbolatov ekinshi oryndy ıelendi. Al erler arasyndaǵy úzdik úshtikti Armenııa Respýblıkasynyń áskerı qyzmetshisi Aık Akopıan túıindedi.
Áıelder arasynda Armenııa Qorǵanys mınıstrliginiń V.Sarkısıan atyndaǵy áskerı ýchılıshesiniń kýrsanty Armıne Grıgorıan úzdik dep tanylsa, ekinshi oryndy Qazaqstan Qarýly Kúshteriniń serjanty Janargúl Aqbalanova enshiledi. Úshinshi oryn Reseı ókili serjant Lılııa Daýtovaǵa buıyrdy.
Tóreshiler baıqaýdaǵy básekelestiktiń joǵary bolǵandyǵyn eskere otyryp, Qazaqstan Qarýly Kúshteriniń serjanttyq quramy postkeńestik aýmaqta áskerı-kásibı turǵyda eń úzdik sanalatyndyǵyn atap ótti.
Ádette áskerdiń kásibıligi, bólimshelerdegi áskerı tártip, jeke quramnyń rýhy serjanttardyń kásibıligimen ólshenetini ras. Demek qazaqstandyq serjanttardyń jeńisi áskerı júıeni basqarýdyń bastapqy kezeńiniń salmaqty ekendigin kórsetip otyr.
Qazaqstannyń mádenıetimen tanysty
Qazaqstan aýmaǵyndaǵy 2018 jylǵy Armııa halyqaralyq oıyndaryna qatysý úshin kelgen álemniń 12 eliniń áskerı qyzmetshileri saıys kezeńderinde ózderiniń kásibı sheberlikterin pash etip qana qoımaı, sonymen birge elimizben etene tanysýǵa úlgerýde.
«Artıllerııalyq oq atý sheberleri», «Suńqar ańshylyǵy» jáne «Senimdi qabyldaý» baıqaýynyń qatysýshylary úshin elimizdiń Qorǵanys mınıstrligi mádenı baǵdarlama uıymdastyrdy. Almatyǵa sapar barysynda oıyn qatysýshylaryn shahardyń kórikti jerlerimen tanystyrdy.
Ázerbaıjan, Belarýs, Venesýela, Zımbabve, Iran, Qytaı, Qyrǵyzstan, Qazaqstan, Reseı, Tájikstan, О́zbekstan jáne Sırııanyń áskerı qyzmetshileri Tuńǵysh Prezıdent saıabaǵyna, Ulttyq murajaı men áıgili «Medeý» muz aıdynyna bardy. Odan basqa, qatysýshylarǵa arnap túski as uıymdastyryldy. Onda saıys meımandaryna qazaqtyń ulttyq taǵamdarynan dám tatqyzdy.
Jeńimpazdardy qarsy aldy
Osy aptada elimizge halyqaralyq armııa oıyndarynyń alǵashqy jeńimpazdary oraldy. Elordadaǵy «Nursultan Nazarbaev» áýejaıynan jurtshylyq «Dostastyq jaýangerleri» halyqaralyq konkýrsynda birinshi oryndy jeńip alǵan qazaqstandyq komandany kútip aldy. Qarsy alýshylar qatarynda Qazaqstan Respýblıkasy Qarýly Kúshteriniń basshylyǵy, áskerı qyzmetshilerdiń týystary men áriptesteri boldy. Atalǵan saıys 28 shilde men 3 tamyz aralyǵynda Armenııa Respýblıkasynyń aýmaǵynda ótken bolatyn. Joǵaryda atap ótkenimizdeı, oǵan Armenııa, Belarýs, Grekııa, Iran, Qazaqstan jáne Reseı áskerıleri qatysty.
Serik ÁBDIBEK,
«Egemen Qazaqstan»
