Elimiz oblystary, Astana, Almaty qalalaryndaǵy bilim berý basqarmalarynyń uıǵarymymen bekitilgen tarıhshy, ólketanýshy ǵalymdar, ádistemeshi-pedagog mamandardyń jumys toby akademık K.Baıpaqovtyń jetekshiligimen jarty jylǵa jýyq merzimde «О́lketaný» oqýlyǵyn ázirledi.
Jańa oqýlyqqa avtorlar tarapynan týyp-ósken ólkeniń tarıhy men ádebıeti, óneri jáne tabıǵı-geografııalyq erekshelikteri týraly maǵulmattar engizildi. Oqýlyqtyń kásibı deńgeıde daıyndalyp, mazmunynyń tartymdylyǵy men árlenýinde «Almatykitap baspasy» mamandarynyń eńbegi erekshe.
«Baspanyń bul saladaǵy tájirıbesi joǵary. Mysalǵa baspadan shyqqan «Meniń Qazaqstanym» toptamasyn alsaq ta jetkilikti. Osy oraıda elimiz tarıhynyń jarqyn betteri, mádenıeti, geografııalyq nysandary týraly kórkem bezendirilgen alpys shaqty albom jaryq kórgen. Baspa mamandarynyń jyldar boıǵy tájirıbesi «О́lketaný» sııaqty jańa ári qyzyqty pándi jınaqtaýǵa septigin tıgizdi. Avtorlar úshin baspamen jumys isteý ońaıǵa tústi dep bilemin» degen pikirimen bólisken «Almatykitap baspasy» bas redaktorynyń orynbasary Almıra Sýjıkova oqýlyq avtorlaryna, ǵalymdar men sarapshylarǵa alǵysyn bildirdi. Aldaǵy ýaqytta oqýlyqtyń hrestomatııasy jáne muǵalimderge arnalǵan ádistemelik nusqaýlyqtary daıyndalatyn bolady.
Oqýlyqtardy shyǵaratyn baspany tańdaý quqyǵy oblystyq ákimshilikter men bilim basqarmalarynyń quzyryna berilgen.
Uıymdasqan ujymnyń qajyrly eńbeginiń arqasynda baspa «О́lketaný» pánin Almaty, Aqtóbe, Túrkistan, Jambyl, Qaraǵandy oblystary men Astana jáne Almaty qalalaryna usynatyn bolady. Shyǵys Qazaqstan jáne Qostanaı oblystarynyń oqýlyqtaryn basýǵa «Atamura» baspasy atsalysýda. Atalǵan baspanyń jetekshi redaktory Murat Muqashevtyń aıtýynsha, oqýlyqtyń sapaly shyǵýy tıisti mınıstrlik tarapynan qurylǵan arnaıy jumys toby men «Oqýlyq» respýblıkalyq ǵylymı-praktıkalyq ortalyǵy mamandarynyń jiti baqylaýynda. Túrli-tústi bezendirilip, mazmuny kásibı mamandarmen tolyqtyrylǵan jańa kitap jas urpaqty otansúıgishtikke baýlýǵa septigin tıgizeri sózsiz dep sanaıdy oqýlyq avtorlary.
Elvıra Serikqyzy,
«Egemen Qazaqstan»
ALMATY
