Jahandaný dáýirindegi qyzyqtyń jalǵan túrleri kóbeıip turǵanda jańa shańyraq kótergen jastarǵa jubaılyq ómirdiń oń-solyn kórsetip, aqyldaryna aqyl, sabyrlaryna tózim syılap otyratyn aldyńǵy býynnyń ózi áltek-áltek kezeńderden ótip, sansyrap qalǵan jaıy taǵy bar.
Osyndaı jaǵdaıda birinshi neke táńirden ekenin túsindirip, nasıhattap otyratyn barlyq otbasylyq ınstıtýtar men tetikter aýadaı qajet bolyp tur.
Endeshe bul kúnderi «Almaty Towers» ǵımaratynda ornalasqan «Open Almaty» Almaty qalasy ákimdiginiń qoǵamdyq qabyldaý alańynda Sotqa deıingi tatýlastyrý ortalyǵy iske kiristi.
Ashylǵanyna aı tolmaǵan atalmysh ortalyqtyń tusaýkeser rásiminde Almaty qalalyq sotynyń tóraǵasy Nurǵazy Ábdiqanov jurtshylyqty Sotsyz tatýlastyrý ortalyǵynyń jumysymen tanystyryp, onyń tıimdiligi, daýdy sotqa deıingi retteýdiń artyqshylyqtary tóńireginde áńgimelep berdi.
– Ata-babalarymyz: «Daý-damaıdyń muraty – bitim» dep teginnen-tegin aıtpaǵan. Azamattar kishigirim quqyqbuzýshylyqtar sot májilisine barmaı-aq, ortalyqqa kelip, ózderiniń daýlaryn retteı alady. Tatýlasý ortalyǵynyń arqasynda olar ózderiniń ýaqyty men shyǵyndaryn únemdeı alady. Munyń ekonomıkalyq jaǵynan tıimdiligi mol. Qos tarap ózderiniń daýlaryn yntymaqpen, bitimgershilikpen sheshe alady, – dedi Almaty qalalyq sotynyń tóraǵasy Nurǵazy Ábdiqanov.
Endigi jerde bul ortalyqqa Almatydaǵy barlyq aýdannyń turǵyndary kelip, ózderiniń daýlaryn sheshe alady. Munda psıholog, pedagog, advokat, medıator, sýdıalar otyrady. Olar halyqqa tegin qyzmet kórsetedi.
Degenmen qazirge Tatýlastyrý ortalyǵyna kelip tabysyp, máselelerine medet taýyp jatqan otbasylar joqtyń qasyndaı deýge bolady.
Atalmysh ortalyqtyń medıatory Alla Shabanovanyń aıtýynsha, qazir munda aqyl surap kelip otyrǵan adamdar az. Bastapqyda birneshe jup kelip, keńes alyp ketken. Biraq, ortalyq qyzmetkerleri olardyń ári qaraıǵy taǵdyrlarynan habarsyz. О́ıtkeni jumysy jandana qoımaǵan mundaı mekemeniń bar ekeni kópshilikke áli de málim emes. Jarnamasy jetispeı turǵan syńaıly.
Alaıda qazir elimizde bitimgerler kómegine júginetinder qatary artyp keledi eken. Máselen, Medeý aýdandyq sotyna 361 aryz-shaǵym tússe, sonyń jartysyna jýyǵy bitimgershilikpen aıaqtalǵan. Eger bul ortalyqtyń jumysyn halyq jaqsy qabyldaıtyn bolsa, aryzdar sotqa emes, osynda túsetin bolsa, sotta qaralatyn ister meılinshe azaısa, onda mundaı ortalyqtar qalanyń basqa da aımaqtarynan ashylatyn bolady.
Aınash ESALI,
«Egemen Qazaqstan»
