О́ńirdiń tańǵajaıyp tabıǵaty kórgen jannyń kózin toǵaıtyp, kókireginde qýanysh samalyn soqtyratyndyǵy támam elge belgili. Solaı bola tura, týrıstik naryqqa qosymsha qyzmetter qosýdyń múmkindikteri áli de tolyq qolǵa alynbaı otyr. Bıznes-modelderdi jetildirip, el ıgiligine jaratqan kezde otandyq, sheteldik ınvestısııa tartýǵa keń jol ashylmaq. Oblystyq týrızm basqarmasy men aýdan ákimdikteri birlese otyryp qolǵa alǵan tartymdy jobalar keńsesine aldaǵy ýaqytta úlken jaýapkershilik júkteledi.
Bolashaqta bul keńse jol boıyndaǵy servısti uıymdastyryp, sıfrly tehnologııaǵa negizdelgen jańa týrıstik marshrýttardy ashý, qonaq úıler men demalys ortalyqtarynyń qurylysy, kóńil kóterý attraksıondaryn ornatý jáne basqa da jobalardy qarastyryp, tıisti uıymdastyrý qyzmetin atqaratyn bolady. О́ıtkeni týrıstik bıznestiń órkendeýi men baǵanyń qoljetimdiligi jandy básekelestikke táýeldi. Iаǵnı zamanaýı týrızm ındýstrııasy sharýashylyq ilkimdilikpen qatar, saýatty bıznes-josparlardy qajet etedi.
Jergilikti atqarýshy organdarmen áriptestik baılanys kóptegen ákimshilik isterdi, jer bólý, ınfraqurylymdy damytý tárizdi máselelerdi aqyldasa otyryp, birlesip kúsh jumyldyryp sheshýge mol múmkindik beredi. Al kásipkerler palatasy kez kelgen bıznes-usynystardy saralap, ınvestısııalyq tartymdylyǵyn aıqyndaıdy. Investorlardyń qatysýymen roýd-shoý uıymdastyrylyp, tańdaýly jobalardyń tanystyrylymy ótkiziledi. Bul úshin arnaıy baılanys jelisi de ashylyp otyr.
Baıqal BAIÁDIL,
«Egemen Qazaqstan»
