Ataqty jazýshy Dýlat Isabekovtiń shyǵarmasynyń jelisimen túsirilgen rejısser Shárip Beısembaevtyń «Gaýhartas» fılminde ǵajaıyp bir kórinis bar. Jaılaý túnin tamashalap júrgen Áskerbek dombyramen quıqyljytyp bir ásem ándi aıtpaýshy ma edi. Al sol «Kelshi, aıym» ániniń áýezine tebirengen kelin Saltanat, bala Qaıyrkenniń bolmysy kúni búgingideı kóz aldymyzda.
Sol ataqty «Kelshi, aıym» ánin dúnıege keltirgen Mels О́zbekov Áýlıeata óńiriniń Qulan jerinde týyp, az ýaqyt bolsa da Almatyda ómir súrip, sońyna sezimińdi selt etkizer ánder jazyp qaldyrdy. Osy ýaqytqa deıin halyq áni dep kelgen «Tobylǵysaı» da Melstiki eken. Qamshynyń sabyndaı qysqa ǵana ǵumyrynda ǵalam ǵajaıybyn ánmen sýrettegen Melstiń muńdy mýzasy týraly da az jazylmady. О́kinishtisi, bul kúnde tarpań taǵdyr ıesiniń esimi kóp aıtyla bermeıtin bolǵan.
О́mir syrǵyp ótip jatyr. Al Melstiń sazy qaıtqan qus qanatynan saýlaǵan saǵynysh sııaqty kóńil túkpirinde kúı bolyp shertilýde. Bul kúnde T.Rysqulov aýdandyq tarıhı-ólketaný mýzeıinde kompozıtordyń talaı ániniń dúnıege kelýine sebepshi bolǵan mandolınasy, baıany men fotoapparaty tur. Áıteýir aýdan halqy Melsti umytpaı, ara-tura osynda kelip turady eken. Mýzeı meńgerýshisi Esnazar Qurymbaevtyń aıtýynsha, Melstiń jıen inisi Tálipbek Shaqbaev bes-alty jyl buryn osy jerge naǵashysynyń fotoapparaty men mandolınasyn ákelip beripti. Al baıannyń naqty qaı jyldan bastap mýzeıde turǵany belgisiz. Bul baıan – kezinde ataqty bolǵan kádimgi «Vostok» baıany. Aspapta «Mels aǵa! Súıikti mýzykalyq aspabyńyz «Vostok» baıanyn syıǵa usynýshy inińiz Tálipbek, kelinińiz Baǵıla. Selınograd qalasy. 30.05.1984 j.» degen jazý bar. Bul baıandy Tálipbek Shaqbaev aǵasy Melske syılaǵan eken.
Búginde jetimsirep turǵandaı kórinetin Melstiń mandolınasy da talaı ándi dúnıege ákelgen qundy jádiger. Munda da «Sazgerler Mels aǵa men Jańbyrshy dosymnyń keıbir ánderiniń týyndaýyna sebepshi bolǵan mandolına aspaby. Tálipbek. 30.05.1972.» degen jazý tur. Án ónerinde aıryqsha qoltańbasy bar Mels О́zbekovtiń bul muralary ómirden erte ketken órteń tulǵanyń ókinishi men muńyn ishine jasyryp turǵandaı áser etedi. Al Jańbyrshy Úseıinov te qulandyq kompozıtor.
Búginde Qulan jerinde Mels О́zbekov atyndaǵy Mádenıet úıi bar. Aýdandyq mádenıet jáne tilderdi damytý bóliminiń basshysy Nurdáýlet Jamalbekov atalǵan mádenıet oshaǵynda talantty ánshiler jumys istep júrgenin, olardyń talaı konkýrstan júldeli oralǵanyn, sondyqtan da mádenıet úıiniń Melstiń atynda bolǵany árdaıym maqtanysh ekenin aıtady. Kompozıtor týraly surastyrǵanymyzda, inisi Tálipbektiń qolynda Melstiń óz daýysy jazylǵan aýdıo taspa bar ekenin estidik. Qazirgi tańda aýdan ortalyǵy Qulan aýylynda turyp jatqan Tálipbek aǵamyz bul qundy jádigerdi de mýzeıge tapsyramyn dep otyr. Qalaı bolǵanda da bul óner adamyna kórsetilgen qurmet, ıgi nıet kórinisi der edik.
Hamıt ESAMAN,
«Egemen Qazaqstan»
