«Búginde avtojanarmaı quıý stansalarynda dızel otynynyń quny ósti. Bul birneshe faktorǵa baılanysty bolyp otyr. Tutyný kóleminiń ósý sebebi óndirilgen dızel otynynyń basym bóligi aýyl sharýashylyǵy jáne temir jol salalaryn qamtamasyz etýge jumsalady. Budan basqa, suranystyń artýy Qazaqstan arqyly ótetin tranzıttik júk tasymalynyń maýsymdyq ósýimen jáne de osy jaǵdaıǵa baılanysty ishki naryqtaǵy jáne kórshi elderdiń shekaralas aımaqtarynda baǵanyń dısparıtetine baılanysty otynnyń shekara asyp ketýine qatysty bolyp otyr. «Benzın (avıasııalyq benzındi qospaǵanda) men dızel otynyna arnalǵan aksızder mólsherlemelerin bekitý jáne Qazaqstan Úkimetiniń keıbir sheshimderiniń kúshi joıyldy dep taný týraly» el Úkimetiniń 2018 jylǵy 6 sáýirdegi № 173 qaýlysyna sáıkes dızel otynyna arnalǵan aksız mólsherlemesi aǵymdaǵy jylǵy 1 maýsymnan bastap 1 lıtr úshin 7,7 teńgege kóterildi. Aýyl sharýashylyǵy taýarlaryn óndirýshilerin dızel otynymen qamtamasyz etý jóninde 2018 jyldyń kóktemgi egis jumystarynyń turaqty júrgizý úshin QR Energetıka mınıstrligi men Aýyl sharýashylyǵy mınıstrligi birlesken túrde kóktemgi egis jumystaryna dızeldik otyndy jetkizý boıynsha munaı óńdeý zaýyttaryna oblystardy bekitip berý kestesi ázirlendi jáne bekitildi. Aýyl sharýashylyǵy mınıstrligi jyl saıyn oblys ákimdikterimen birlesip, aýyl sharýashylyǵy taýarlaryn óndirýshilerge qajetti munaı ónimderiniń kólemin anyqtap, Energetıka mınıstrligine egis jáne egisti jınaý jumystaryn júrgizýge arnalǵan AShTО́ úshin dızeldik otyndy jetkizý kólemi týraly usynystardy engizedi. AShTО́ úshin MО́Z-den dızel otynyn jóneltýge basymdyq zań deńgeıinde berildi, baqylaý men monıtorıng júrgizý táýlik boıy júzege asyrylady. Joǵaryda baıandalǵannyń negizinde Energetıka mınıstrligi 2018 jylǵy egis jumystaryn turaqty júrgizý úshin jan-jaqty sharalar qoldanyp jatqanyn habarlaımyz», dedi Energetıka vıse-mınıstri B.Aqsholaqov.
Raýan QAIDAR,
«Egemen Qazaqstan»
