Aıtyp kelmeıtin apat halyqtyń alańdaýshylyǵyn týdyrýmen qatar, memleketke de orasan zııan keltiredi. Jambyl oblysynyń Qyrǵyzstan Respýblıkasymen shekaralas aımaǵynyń taýly bókterinde órt shyǵyp, eki kún boıy jergilikti tótenshe jaǵdaı qyzmetkerlerin ábigerge saldy. Tilsiz jaýdy aýyzdyqtaýǵa 80-ge tarta adam men 10 tehnıka jumyldyrylǵan. Alaıda adam men tehnıka kúshine boı bermegen alapat apat taýly aımaqty biraz jaılady. Boljam boıynsha qurǵaq shóptiń tutanýynan bolǵan órt 200 gektar jerdi sharpyǵan.
Apat atyp kelmeıdi. Alapat órtti sóndirý kezinde T.Rysqulov aýdany, Aqyrtóbe orman sharýashylyǵy mekemesiniń ormanshy-qoryqshysy, Qaıyńdy aýylynyń 46 jastaǵy turǵyny Asylbek Altaev qaza tapty. Qyzyl jalynmen aıqas kezinde taý shyńynan aıaǵy taıyp ketip ajal qushqan azamattyń artynda bes balasy qaldy. Al Aqyrtóbe ormandardy jáne janýarlar dúnıesin qorǵaý jónindegi mekeme basshysy Jandar Muzdybaev ta bul oqıǵanyń jumys barysynda bolǵanyn aıtyp, qaıǵyly oqıǵanyń shynymen oryn alǵanyn rastap otyr. Al asyraýshysynan aıyrylǵan otbasynyń jaǵdaıy aıtpasa da túsinikti.
Bıyl Jambyl óńirinde eshqashan bolmaǵan jaz boldy. Kúnniń qyzýy qyryq gradýstan asyp ketip, tipti turǵyndardyń tańdanysymen qatar, úreıin de týǵyzdy. Alaıda tabıǵattyń tosyn minezine tótep berý múmkin emes. Sondyqtan da árbir azamat tabıǵatqa janashyrlyqpen qarap, órt qaýipsizdigine jiti mán berse eken deısiń. Aı men kúnniń amanynda arystaı azamatynan aıyrylyp qalǵan Altaevtar otbasynyń basyndaǵy qaıǵyly jaǵdaı endi qaıtalanbasa eken.
Hamıt Esaman,
«Egemen Qazaqstan»
Jambyl oblysy
