Qańtardyń jaýyn-shashynyna qaramastan egistik alqapta jumys jasap jatqan dıqandardyń jaı-kúıinen habar alý úshin aýdan ákimi Baqyt Asanov «Maqtaaral» aýyldyq okrýgindegi «Ferýdın» sharýa qojalyǵyna bardy. Alıev Mırzadınniń basshylyǵyndaǵy qojalyqtyń enshisinde 10 gektar jer bar bolsa, sonyń 5 gektaryna qyryqqabat daqyly egilip jatyr eken. 30 adamnan quralǵan brıgada qańtardyń árbir jyly kúnin paıdalanyp, jaýyn-shashynǵa qaramastan jumys jasap jatyr.
«Jylyjaıda 120 myń túp qyryqabattyń kóshetin daıyndap, 30 adamnan quralǵan brıgadamen kóshet otyrǵyzýdy bastadyq. Jumysshylarǵa kúnine 2 myń teńgeden eńbek aqysyn tóleýdemiz. Negizinen 2 aıdyń kóleminde ekken eginimiz pisip, jetiledi. Sondaı-aq, 90 kúnde jetiletin sortyn da ektik. Egilgen kóshettiń ústin japqyshpen jaýyp, jaýyn-shashynnan qorǵaımyz. Eń bastysy - kútip-baptaýǵa úlken mán berilýi kerek», - dedi M.Alıev.
Aýdan basshysy Baqyt Nasyrhanuly jumysshylarǵa qolǵabys jasaý úshin qyryqqabat egýge kómektesip, kóshetter otyrǵyzdy. Sondaı-aq, qojalyq ıeleriniń eginine bereke tilep, mol ónim alý úshin tynbaı eńbektený kerektigin aıtty. Al, M.Alıev jaýyn-shashynǵa qaramastan egin alqabyna arnaıy kelgen aýdan ákimine alǵysyn bildirip, bul salada óziniń tájirıbesi óte mol ekendigin tilge tıek etti. Tipti, ol ótken jeltoqsan aıynda alǵashqy eginin bastap qoıǵanyn atap ótip, óńir basshysyn tańdandyrdy.
Maqtaraldyq dıqandar negizinen salmaǵy 1-1,5 keliden aspaıtyn qyryqqabattyń nıderlandyq pandıon surpyn otyrǵyzýda. Erte pisetin ónim túrine eýropalyqtar men reseılikter tarapynan suranys kóp.
Jalpy, qyryqqabat daqyly erte pisetindikten, maqtaraldyq dıqandar onyń sońynan qaýyn-qarbyz, maqta sııaqty t.b. daqyldar egýge kirisedi. Osylaısha jer emgen sharýalar 1 jylda eki ret ónim alady. Byltyr sáýir aıynda alǵashqy ónimin alǵan maqtaraldyq dıqandar respýblıkanyń birneshe oblysyn jáne Reseı Federasııasyn qyryqqabatpen qamtamasyz etken bolatyn.
Aıta keteıik, Maqtaral aýdanynda byltyr 30 myń tonnaǵa jýyq kókónis ónimderi qambaǵa jınalǵan. Al, onyń basym bóligi qyryqqabat bolatyn.
