Qazaqstannyń Tuńǵysh Prezıdenti Nursultan Nazarbaevtyń óz ókilettigin toqtatýy eń aldymen memleketiniń keleshegine, saıası turaqtylyqqa jáne budan ári qaraıǵy Qazaqstannyń damýyna baǵyttalǵan qadam dep oılaımyn. N.Nazarbaev keleshekte Túrkııanyń negizin qalaǵan Mustafa Kemal Atatúrik, Malaızııanyń burynǵy hám qazirgi premer-mınıstri Mahathır Mohamad sııaqty tarıhta mártebeli orynǵa ıe bolýy ǵajap emes.
Qazaqstan men Qyrǵyzstan eń jaqyn, baýyrlas elder. Sondyqtan Qazaqstanda bolyp jatqan oqıǵalar bizdi de beıjaı qaldyrmaıdy. N.Nazarbaev osynaý qadamy arqyly Orta Azııa memleketterinde qalyptasqan dástúrdi buzyp, tyńnan túren saldy, óz yqtııarymen jáne tolyq lıgıtımdi jolmen jańa býynǵa bılikti tabystady.
Prezıdenttiń mindetin atqarýshy retinde jaýapkershilik júktep otyrǵan Qasym-Jomart Toqaev ta Qyrǵyzstan úshin belgili qaıratker, qazaq-qyrǵyzdyń salt-sanasyn jaqsy biletin memleketshil, kánigi dıplomat. Orta Azııa saıasatkerleriniń arasynan tuńǵysh ret Eýropada joǵary laýazymdy qyzmet atqaryp, BUU-nyń Eýropadaǵy qurylymdarynyń jetekshisi bolǵan tulǵa. Ol birqatar halyqaralyq bastamalardyń avtory.
Nursultan Nazarbaev el basqaryp turǵan sátte Qazaqstannyń halyqaralyq bedeli arta tústi. Memleket bedeliniń ósýine Syrtqy ister mınıstri, Premer-Mınıstr, Parlament Senatynyń Tóraǵasy retinde Qasym-Jomart Toqaevtyń da zor eńbegi sińdi dep bilemiz. Qazaqstandaǵy tranzıttik bılik almasý, alda bolatyn saılaý ádil ári ashyq básekelestik negizinde, demokratııaly túrde ótedi dep senemiz.
Qanybek IMANÁLIEV,
Qyrǵyz Respýblıkasy Jogorký Keneshiniń depýtaty