Semeı qalasyndaǵy Shákárim atyndaǵy úsh tilde oqytatyn kópbeıindi gımnazııanyń 11-synyp oqýshysy Qusman Baqytjan búginge deıin balamasy eshbir elde jasalmaǵan jel týrbınasyn tanystyrdy. 16 jastaǵy oqýshy ákesimen birge jasaǵan eki qalaqshadan ǵana turatyn jel týrbınasynyń kóptegen artyqshylyǵy bar ekenin aıtyp berdi. «Jel týrbınasynyń bul túri álemde joq. Bul eki qalaqshasymen ǵana energııa shyǵarady, dızaıny erekshe. Energııany kóp óndiredi. Aýyl sharýashylyǵyna jáne energııa joq nemese energııa kózderi aýyr alynatyn jerlerde qoldanýǵa bolady. Ornatý, jóndeý ońaı. Eń bastysy, ekonomıkalyq jaǵynan óte tıimdi. Qazirgi kezde eń arzan degen jel týrbınalarynyń baǵasy 1 mıllıon teńgeden asatyn bolsa, munyń baǵasy jarty mıllıonǵa da jetpeıdi», deıdi joba avtory.
Nur-Sultan qalalyq №73 fızıka-tehnıkalyq mektep-lıseıniń 10-synyp oqýshysy Jumabek Nurahmet jurtshylyqqa «Florarıým – ekologııalyq ónim» atalatyn jobasyn kórsetti. «Florarıým degenimiz – ósimdikterdi saqtaýǵa jáne ósirýge arnalǵan shynydan nemese móldir materıaldan jasalǵan qorap. Onyń ishinde belgili bir temperatýra saqtalady jáne ósimdikke zııan keltiretin jándikter kire almaıdy. Bizdiń jobamyzdyń basty ereksheligi – florarıýmǵa tamshylatyp sýarý tehnologııasyn qoldanýymyz. Bul úı ósimdikterine óte yńǵaıly. Sonymen qosa biz topyraqtyń ylǵaldylyǵy datchıgin oılap taptyq. Ol tamshylatyp sýarylǵan kezdegi topyraqtyń ylǵaldyǵyn anyqtaýǵa múmkindik beredi», deıdi ol.
