Bilim departamentiniń basshysy Gúlmıra Kárimovanyń aıtýyna qaraǵanda birer jyldyń ishinde túıtkildi máseleni túpkilikti sheshý kózdelgen. Atap aıtqanda, 1500 balaǵa arnalǵan eki qazaq bilim ordasy bıylǵy jańa oqý jylyna deıin tapsyrylmaq. 900 oryndy mektep «Jasórken», 600 oryndy mektep «Bereke» yqsham aýdanynda boı kóteredi.
«Sońǵy 12 jyl ishinde óńirde birde-bir mektep salynbaǵan. Taǵy bir bilim úıin salýǵa jer bólinip, qujattary ázirlenýde», deıdi Gúlmıra Raıynbekqyzy.
Jalpy oblysta 5 mektepte sabaq úsh aýysymǵa kóshirilgen. Taıynsha jáne Beskól eldi mekenderinde de bilim ordasyna degen suranys bar. Bıyl 3 myńnan astam túlek mektep bitirse, 9 myńǵa jýyq búldirshin mektep tabaldyryǵyn alǵash attaıdy. Mamandardyń aıtýynsha, sońǵy 2-3 jylda oblysta 1-synypqa baratyn balalardyń sany úsh ese artqan.
