Ár apta saıyn jármeńkege oblys ortalyǵyna jaqyn ornalasqan óńirdegi Aqqýly, Ýspen, Sharbaqty, Tereńkól aýdandary men Pavlodar qalasy aýmaǵyna qarasty aýyl aýmaqtarynyń aýyl sharýashylyǵy ónimderin óndirýshiler qatysady.
Oblys ortalyǵynyń turǵyndary aýyl sharýashylyǵy ónimderiniń jármeńkesin asyǵa kútedi. Kartop, kókónis ónimderiniń kelisi 50-60 teńge aralyǵynda. Jármeńkede barlyq ónim bar, jetkilikti. Tek sút joq, sút aýdandardan jetkizilmeıdi.
Apta saıyn keletin jalǵyz Ýspen aýdany, «Galıskoe» JShS-niń sútin satyp alý úshin qala turǵyndary uzyn-sonar kezekte turady. Sútke suranys kóp bolǵandyqtan, bir emes, birneshe jerden satylýy kerek deıdi turǵyndar.
Oblys ákimi Bolat Baqaýov mamyr aıynda jármeńkeni aralaǵan kezde oblystyq Aýyl sharýashylyǵy basqarmasyna sútke suranys joǵary bolǵandyqtan, birneshe jerden satýǵa tapsyrma bergen edi. Osy aptada ótken, 8 maýsym kúngi jármeńkede turǵyndar «Galıskoenyń» sútin satyp alý úshin taǵy da kezekke turýǵa májbúr boldy. Seriktestik súttiń 1 lıtrin 130 teńgeden saýdalaıdy.
Al Tereńkól aýdanynan kelgen «Kedr» aýylsharýashylyq óndiristik kooperatıvi jeke menshik qosalqy sharýashylyqtardan súttiń lıtrin 70 teńgeden satyp alady. Jınalǵan ónimdi maı óńdeý zaýytyna tapsyrady.
- Al jármeńkede 130 teńgeden saýdalaıdy. Sútke suranys kóp, - deıdi kásipkerler.
Pavlodar oblysy
Sýretti túsirgen Valerıı Býgaev
