Osy jyly Álkeı Marǵulan atyndaǵy arheologııa ınstıtýtynyń mamandary Almaty oblysy Talǵar aýdanyndaǵy Talhız qalashyǵynyń qazba jumystaryn aıaqtady. Bul týraly «24 kz» habarlady.
Jalpy, Talǵar mańyndaǵy kóne Talhız qalashyǵy XX ǵasyrdyń ortasynan beri túbegeıli zerttelip keledi. Ǵalymdardyń málimdeýinshe, Uly Jibek jolynyń boıyna oryn tepken bul kóne qalada mádenıet pen saýda-sattyq qatar damyǵan. «Bıyl memlekettik deńgeıde Talhız qalashyǵyn zertteýge arnaıy qarajat bólindi. Endigi mindet – osy kıeli mekendi qorshap, ondaǵy qundy jádigerlerdi kózdiń qarashyǵyndaı saqtaýymyz qajet. Sebebi, qazir onyń aınalasy ashyq jatyr. Bul isti jyldam qolǵa almasaq, qalashyqtyń aınalasy búlineri haq», - deıdi tarıh ǵylymdarynyń kandıdaty Tamara Saveleva.
Elimiz arheologtary orta ǵasyrlyq Talhız qalashyǵyn IýNESKO dúnıejúzilik mádenı murasyna engizýge úmittenip otyr. Biraq, odan buryn ashyq jatqan keıbir bóligin qorshaýǵa alǵan jón.
Danııar Túımebaı.
