28 sáýirge deıin 42,5 myń teńge áleýmettik tólemdi 275 myńnan astam azamat aldy. Áleýmettik tólemdi alýǵa barlyǵy 594,7 myńnan astam adam ótinim berdi. 301 myń ótinim keri qaıtaryldy. Sonymen qatar Nur-Sultanda «Biz birgemiz» aksııasy aıasynda kómek kórsetýdiń ekinshi kezeńi bastaldy, onymen 28 073 adam qamtylady, dep málimdedi seısenbide ortalyq kommýnıkasııalar qyzmetinde ótken brıfıngte qala ákiminiń orynbasary Baqtııar Maken.
«Elbasynyń bastamasymen bastalǵan «Biz birgemiz» aksııasynyń sheńberinde elordada 19 naýryz ben 23 sáýir aralyǵynda áleýmettik osal topqa jatatyn 14 478 otbasyǵa Nur Otan partııasynan 50 000 teńgeden áleýmettik kómek kórsetildi. Partııa, bıznesmender men qaıyrymdy azamattardyń kúshimen 11 000 azyq-túlik jıyntyǵy tapsyryldy. Naýryz aıynyń sońynan búginge deıin 1,5 mıllıon antıseptıkalyq maska úlestirildi. Jalpy, qalada túrli áleýmetik jumystarǵa qalalyq shtabtan 500 erikti jumyldyryldy», – dep atap ótti B.Maken.
Aıta keteıik, memleket basshysynyń tapsyrmasyna sáıkes, TJ kezinde kirisinen aıyrylǵan azamattarǵa áleýmettik kómek kórsetý jumysy jalǵasýda. Habarlanǵandaı, Uly Otan soǵysyndaǵy Jeńistiń 75-jyldyǵyn merekeleý aıasynda qalada UOS ardagerlerine 1 mln. teńgeden tólem berile bastady. Búgingi kúni elordada Uly Otan soǵysynyń 44 ardageri bar. Bir rettik aqshalaı tólemderdi tyl eńbekkerleri, qaıtys bolǵan Uly Otan soǵysynyń qatysýshylary men múgedekteriniń áıelderi, sondaı-aq Uly Otan soǵysynyń ardagerlerimen jeńildikter men kepildikter boıynsha teńestirilgen barlyq adamdar alady.
