Bul mekemelerde arnaıy orta jáne joǵary bilimdi 844 veterınar mamandar jumys isteıdi. Aǵymdaǵy jyly memlekettik tapsyrysqa sáıkes, janýarlardyń asa qaýipti 14 túrli aýrýyna qarsy vaksına egý, 2 aýrýdyń túri boıynsha allergııalyq tekserý jáne mal arasynan 25 túrli juqpaly aýrýlardy anyqtaý boıynsha dıagnostıkalyq is-sharalar jospar boıynsha oryndalýda. Qajetti barlyq veterınarııalyq preparattar alynyp, aýdandardaǵy ýaqytsha saqtaý oryndaryna jetkizilgen. Aýdandardaǵy veterınarııalyq kásiporyndarda preparattardy ýaqytsha saqtaıtyn qoımalar da bar. Dıagnostıkalyq zertteýlerge júrgizilgen taldaý boıynsha maldar arasynda sozylmaly brýsellez aýrýyna shaldyǵý jyldan jylǵa tómendeýde.
Deı turǵanmen, jaz mezgili kele salysymen kenege qarsy jumystar qyza túsedi. «Kongo-Qyrym gemorragııalyq qyzbasynyń tabıǵı oshaǵynda ornalasqan Taraz qalasy jáne Baızaq, Jambyl, Talas, Moıynqum, Sarysý aýdandarynyń eldimekenderinde aýrýdyń aldyn alý sharalary júıeli túrde jyl saıyn júrgiziledi. Jyl saıyn oblys ákimdiginiń alqa otyrysynda atalǵan aýrý boıynsha epızootııalyq jáne epıdemıologııalyq jaǵdaı qaralyp, oblys ákiminiń qaýlysymen tabıǵı oshaqta atqarylatyn is-sharalar jospary bekitiledi. Kenege qarsy is-sharalar jyl basynda aldyn ala josparlanǵan josparǵa sáıkes jáne tabıǵı ortadaǵy keneniń belsendiligine qaraı kóktem mezgilinde eki kezeńde, kúz mezgilinde bir ret júrgiziledi. Bıylǵy jyly oblys aýmaǵynda Baızaq aýdanynda 4, Jambylda 2, Moıynqumda 12, Talasta 8, Sarysýda 18 jáne Taraz qalasynda 5, barlyǵy 49 eldimekenge zalalsyzdandyrý jumystary júrgizilýde», deıdi Jambyl oblystyq veterınarııa basqarmasy basshysynyń mindetin atqarýshy Qanatbek Qartabaev.
Aǵymdaǵy jyly oblystyq bıýdjetten keshendi is-sharalardy ótkizýge arnalǵan kenege qarsy dezınfeksııalyq dári-dármekter satyp alýǵa 78 mıllıon 484 myń teńge qarajat bólingen. Maldar men mal qoralaryn dezınfeksııalyq dárileý jumystaryn júrgizý úshin jergilikti bıýdjetten 57 mıllıon 270 myń teńge bólingen. Búginde kóktemgi birinshi kezeńniń jumystary endemııalyq aýdandarda tolyq aıaqtalǵan. Nátıjesinde, kólemi 4 403 610 sharshy metr bolatyn 16228 qora-jaı jáne kólemi 232 089 sharshy metr bolatyn 273 býferlik aımaq zalalsyzdandyrylyp, barlyǵy 556448 bas aýyl sharýashylyǵy janýarlary kenege qarsy dárilengen. Qazirgi tańda, ekinshi kezeńiniń jumystary júrgizilýde eken. «Tabıǵı oshaqtaǵy epızootııalyq-epıdemıologııalyq jaǵdaıdy turaqty túrde ustap, aýrý deńgeıin tómendetý sharalaryn júrgizýde veterınarııa jáne medısına, jergilikti ákimshilikterdiń qyzmetkerlerimen birge turǵyndardyń da óz úlesterin qosýy arqyly is-sharalarǵa oń septigin tıgizýde. Oblystyń mekemelerimen turǵyndar arasynda sanıtarlyq aǵartý jumystary turaqty túrde júrgizilýde», - deıdi Qanatbek Qartabaev.
Jambyl oblysy
