"Jarysqa 2800-den astam adam qatysty. Atalmysh chempıonattyń jyl ótken saıyn mańyzy kúsheıip, qatysýshylardyń sany artýda. Qazaqstan atynan "Veb-dızaın jáne óńdeý" quzyrettiligi boıynsha Pavlodar Aqparattyq tehnologııalar kolledjiniń túlegi, al qazir "Toraıǵyrov ýnıversıteti" AQ stýdenti Dına Afanaseva baq synady. Jas kásipqoı Eýrazııalyq chempıonatta birinshi oryn alyp, 2021 jyldyń kókteminde ótetin Eýropalyq WorldSkills-ke qatysý úshin Avstrııaǵa joldama aldy", dep jazdy Dinıslam Bolathanuly.
Basqarma basshysynyń aıtýynsha, Qazaqstan ókilderiniń Eýrazııalyq chempıonatqa qatysýy - eldegi qozǵalysty odan ári damytý jáne TjKB júıesine ozyq praktıkalar men WorldSkills quraldaryn engizý úshin WorldSkills Russia-men uzaq merzimdi yntymaqtastyqtyń jalǵasy.
Qazaqstan quramasy 2017 jyldan bastap jyl saıyn WorldSkills Russia Ulttyq chempıonatynyń fınalyna qatysady. Qazaqstannyń jas kásipqoılary chempıonatta toǵyz quzyrettilik boıynsha synǵa túsip júr.
Dına Afanaseva atap ótkendeı, halyqaralyq chempıonatqa qatysý óziniń praktıkalyq daǵdylaryn damytýǵa jáne teorııalyq bilimderin nyǵaıtýǵa ǵana emes, sonymen qatar basqa elderdiń qatysýshylarymen jáne sarapshylarymen úzdik tájirıbeler jáne quraldarmen almasyp, halyqaralyq tájirıbe alýǵa múmkindik beredi.
