Sybaılas jemqorlyqqa qarsy qyzmettiń basshysy «SQ-Farmasııa» JShS operasııalyq qoımasyna bardy. Qoıma oblystyń emdeý mekemeleri men uıymdarynyń Nur-Sultan qalasyndaǵy habtan dárilik preparattar men medısınalyq buıymdardy jedel alý qaǵıdaty boıynsha uıymdastyrylǵan.
Túrli aýrýlardy stasıonarlyq jáne ambýlatorııalyq emdeýdi qamtamasyz etý aıasynda medısınalyq mekemelerdiń dástúrli ótinimderine de, koronavırýstyq ınfeksııany emdeýge qajetti qarajatqa tapsyrystarǵa da qyzmet kórsetiledi.
«Ákimdik dári-dármekter, dárigerlerdi qorǵaý quraldary, onyń ishinde gýmanıtarlyq kómek aıasyndaǵy ashyqtyqqa nazar aýdara otyryp, qoǵamdyq uıymdardy belsendi túrde tartýda. Pandemııa árbir qazaqstandyqqa áser etti. Sondyqtan barmaq basty, kóz qysty jumys bolmaýy tıis. Árbir dári-dármek alaıaqtardyń tabys kózine aınalmaı, tutynýshysyna jetýi óte mańyzdy», - dep basa aıtty Alık Shpekbaev.
Aıta keteıik, buǵan deıin birqatar óńirlerde monıtorıngtik toptar dári-dármekter men qorǵanys quraldarynyń azaımaıtyn qoryn qalyptastyrýdaǵy máseleler týraly málimdegen bolatyn. «SQ-Farmasııa» Qostanaı fılıalynyń ókilderi barlyq logıstıkalyq qateler eskerilgenin jáne búgingi kúni óńirde qajetti qor bar ekenin aıtty.
Jergilikti atqarýshy organdardyń ókilderi habarlaǵandaı, koronavırýstyq ınfeksııany, pnevmonııany jáne JRVI emdeýge baǵyttalǵan dárilik zattarmen azamattardy qamtamasyz etý maqsatynda dárihana jelileri men farmasevtıkalyq fırmalardyń dıstrıbıýtorlaryna 538 mln.teńge bólindi.
Osyǵan baılanysty, Agenttik tóraǵasy pandemııanyń ekinshi tolqynyna daıyndyq barysynda oblystyń materıaldyq qory esebinen satyp alynǵan dári-dármekterdi satatyn «Svetnaıa» dárihana jelisin aralady.
