Pavlodar kitaphanasynyń balalar ádebıeti bólimine kúrdeli jóndeý júrgizildi

Bilim • 05 Jeltoqsan, 2020

Pavlodar kitaphanasynyń balalar ádebıeti bólimine kúrdeli jóndeý júrgizildi

138 ret kórsetildi

S.Toraıǵyrov atyndaǵy Pavlodar oblystyq kitaphananyń balalar ádebıeti bólimi (Lýnacharskıı kóshesi, 9/2 úı) kúrdeli jóndeýden ótip, qoldanysqa qaıta berildi. Qaıta jańartylǵan kitaphanaǵa óńir basshysy Ábilqaıyr Sqaqov arnaıy kelip, atqarylǵan jumysqa oń baǵa berdi, dep habarlaıdy Egemen.kz.

Farhat QAIRATULY

Ǵımaratqa kúrdeli jóndeý jumysy «Jumyspen qamtý jol kartasy» baǵdarlamasy aıasynda júrgizildi. 1969 jyldan beri jóndelmegen ǵımarat alǵash ret zamanaýı standartqa sáıkestendirilip otyr.

– Memleket kitaphanalar men basqa da áleýmettik nysandardyń jaǵdaıyna úlken kóńil bólip keledi. Balalar oqý ortalyǵynyń Tuńǵysh Prezıdent kúni qarsańynda ashylýy – aıtýly oqıǵa. Jóndeý jumystarynyń sapaly atqarylǵany kózge birden kórinip tur. Pandemııa aıaqtalǵan soń bul jerde balalar alańsyz bilim alatyn bolady. Jumysty tez ári tııanaqty atqarǵan merdiger kompanııaǵa rızashylyq bildiremin, – dedi Ábilqaıyr Sqaqov.

Aıta keterligi, oblystyq kitaphananyń balalar ádebıeti bólimine Qazaqstan Jazýshylar odaǵynyń múshesi, aqyn, balalar ádebıetiniń kórinekti ókili, jerlesimiz Súleımen Baıazıtovtyń esimi berildi.

– Ákem balalardy qatty jaqsy kóretin. Sondyqtan bolar onyń shyǵarmashylyǵynda balalar ádebıeti úlken oryn aldy. Búgin osy ortalyqty aralap shyǵyp, keremet áser aldym. Osy jerde balalar alańsyz bilim alsa deımin. Bul tek kitap oqýǵa arnalǵan oryn emes, jetkinshekterdi otansúıgishtikke, patrıotızmge, ádebıet álemine tárbıeleıtin rýhanı orda bolaryna senemin. Ákemniń eńbegin elep-eskerip, qurmet tutqan jandarǵa myń alǵys, – deıdi jazýshynyń uly Muhıt.

Elý jyldan astam ýaqyt jóndeý kórmegen nysanda jas jetkinshekterdiń bilim alýyna, ýaqyttaryn tıimdi ótkizýine barlyq jaǵdaı jasalǵan. Kitaphannyń qyzmet kórsetý júıesi birneshe aımaqqa bólingen. Máselen, «Bilimpaz» aımaǵynda abonement pen oqý zaly bar. Bul jerde oqyrmandar úshin úıge kitap alýǵa nemese oqý zalynda otyryp kitap, gazet-jýrnaldar oqýǵa múmkindik bar. «Baldyrǵan» oqý aımaǵynda mektepke deıingi jáne bastaýysh mektep jasyndaǵy balalarǵa arnalǵan tanymdyq oıyndar aımaǵy shoǵyrlanǵan. «О́rken» ulttyq shyǵarmashylyq aımaǵynda balalardyń oqýǵa degen qyzyǵýshylyǵyn ulttyq salt-dástúrler arqyly damytýǵa, shyǵarmashylyqqa baýlýǵa basymdyq berilmek. Atalǵan aımaqta Qazaqstan Jazýshylar odaǵynyń Pavlodar oblystyq fılıaly men kitaphana ujymy birlesken jobalardy júzege asyrýdy josparlaýda. «IT-Bala» medıa aımaǵy jas oqyrmandardy kompıýterlik saýattylyqqa baýlý, aqparattyq mádenıetti qalyptastyrýǵa arnalǵan. «Zerde» ıntellektýaldyq aımaǵynda túrli taqyryptardaǵy semınarlar, konferensııalar, prezentasııalar, trenıngter, oıyn-saýyq sharalary ótetin bolady. Zamanaýı tehnıkalar arqyly jas oqyrmandarǵa ár túrli janrdaǵy beınefılmder kórsetilip, jastardyń tanym kókjıegin keńeıtýge den qoıylmaq.

– Men 6-synypta oqımyn. Ortalyqtyń jańartylyp qaıta ashylǵanyn áleýmettik jeli arqyly bilip, qýanyp otyrmyn. Kitaphananyń ishi jarqyrap tur. Kitap oqýdan sharshaǵan sátte boı sergitetin oıyn alańdaryn da kórip qaldym. О́z basym karantındik shekteýlerdiń aıaqtalǵanyn asyǵa kútemin. Kitaphana men dostarymdy saǵyndym,– deıdi jas oqyrman Aızat Álfarabı.

S.Toraıǵyrov atyndaǵy oblystyq kitaphananyń basshysy Sholpan Shahmetova balalar ádebıeti bóliminde 86 myńnan astam kitap qory bar ekenin atap ótti. Kitaphana qory únemi jańa kitaptarmen tolyqtyrylyp turady. Jyl saıyn orta eseppen 5 myńnan astam jas oqyrman osynda kelip, bos ýaqytyn tıimdi ótkizýge múmkindik alady. Ishi jaryq ári jyly kitaphana tolyqtaı zamanaýı tehnıkalyq quraldarmen jabdyqtalǵan. Jańartylǵan nysan balalar úshin qyzmet kórsetýge saqadaı saı.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz