Basty qundylyq – halqymyzdyń aýyzbirshiligi

Kúni keshe Memleket basshysynyń sheshimimen agrarlyq salada atqarǵan uzaq jylǵy eńbegim elenip, «Parasat» ordenine laıyq dep tanyldym. Jasym jetpisten assa da bul marapat jańa belesterdi baǵyndyrýǵa shabyttandyrady. Táýelsizdik alǵaly beri elimiz túrli kezeńderdi basynan ótkerip keledi. Jarqyn sáttermen birge egemen memleketimiz san alýan syn-qaterlermen betpe-bet kelgen kezderi az bolǵan joq. Sonyń barlyǵyn halyqpen birge kórip, erteńgi kúnimizge úlken úmitpen qaraımyz. Joǵaryda aıtqanymdaı, 50 jyldan artyq qyzmettik ǵumyrymdy otandyq aýyl sharýashylyǵy salasyna arnadym. Balalarym áke jolyn tańdap, ózimmen birge eńbek etip júr. Osy aralyqta jumys oryndaryn saqtap, mal sharýashylyǵyn órkendetýge barynsha kúshimizdi salyp jatyrmyz. Atap aıtqanda, qazir qojalyǵymyzda 2 800-deı iri qara bar. Onyń ishinde 700-ge jýyǵy saýyndy sıyrlar. Eń bastysy, yntymaǵy myǵym ujym qalyptasty. Eńbegimizdiń jemisin ujymdaǵy aýyzbirshiliktiń arqasynda kórip otyrmyz desem artyq aıtqandyǵym emes. Áleýmettik máseleler birtindep sheshilip keledi.

Qazir kóptegen múmkindik qarastyrylǵan. Memleket te qoldaý kórsetip júr. Jol, sý jáne gaz syndy qajetti ınfraqurylymdyq jeliler eldi mekenderge tartylyp jatyr. Bıyl aýdanymyzda ár úıge sý tartylady dep josparlanyp otyr. Jol salý máselesi de udaıy nazarda ekeni qýantady. Halyq munyń barlyǵyn kórip otyr. Tek qana jumys isteý qajet.

Prezıdenttiń aıtqandary kóńilge qonymdy. Bıyl pandemııa elimizdi ǵana emes, búkil álemdi synaq rejiminen ótkizdi. Bul synaqqa halqymyzdyń aýyzbirshiligi men yntymaǵy arqyly tótep berip, jahandyq daǵdarystan shyǵý úshin bar kúsh-jigerimizdi jumyldyra bildik. Ýaqtyly qabyldanǵan sharalardyń nátıjesinde jaǵdaı turaqtaldy desek te bolady.

Aýylda týyp-ósken adammyn. Qajyrly eńbek­tiń qandaı bolatynyn jaqsy túsinemin. Zeınet jasynda bolǵanyma qaramas­tan, atqa otyryp, traktordy qazir de tizgin­deı alamyn. Sebebi eńbek jolymda barlyq sa­ty­lardan ótip shyqtym. Tutastaı derbes elimiz­diń irgesi qalanǵanynan bastap, onyń gúldený kezeńderiniń kýágeri bolǵanyma qýa­nyshtymyn. Munyń bári men úshin asa qym­bat. Bizdiń jalǵyz Otanymyz – Táýelsiz Qazaq­stan! Meniń túsinigimde basqa Otan joq. Sol sebepti elimde ómir súrip, eńbek etemin. Bul pikirimdi balalarym da qýattaıdy.

Nıkolaı ShERER,

«Frýnzenskoe» JShS dırektory,

Qostanaı oblysy