Qala turǵyndarynyń beıbit ómirin qamtamasyz etýshi jaýyngerler qyzmet etetin 5573 áskerı bólimi – áskerdiń eń elıtaly jedel quramasy. Bul quramanyń jeke quramy jan-jaqty baǵyttaǵy mindetterdi atqarýǵa jumyldyrylady. Qalashyqtyń aýmaǵy men qarý-jaraq qoımasyn kúzetetin ishki qaraýyl, jarylǵysh zattar, esirtki izdegish jáne qylmyskerdiń izin kesýshi qyzmettik ıtterdi daıyndaıtyn kınologııalyq ortalyq, mańyzdy resmı is-sharalar men saltanatty rásim kezinde, áskerı dástúrlerde aıryqsha qyzmet atqaratyn Qurmet qaraýyl rotasy bar. Áskerdiń án-bı ansambli men orkestri, horeografııa jáne hor ujymdary, Ortalyq murajaıy da qalashyq bazasynda ornalasqan.
Quramanyń jańa tehnologııalarmen jabdyqtalǵan mádenıet ortalyǵy men lazareti, atý tıri, úsh zaldan turatyn sport kesheni bar. Munyń bári jeke quramnyń jaýyngerlik daıyndyǵyn úzdiksiz shyńdaýǵa, mobıldendirýge jasalǵan jaǵdaı dep bilgen jón. Tótenshe jaǵdaılar kezinde jeke quram dabyl qaǵylysymen oqıǵa ornyna attanýǵa nemese tıisti mindetti oryndaýǵa jedel jasaqtalady. Degenmen, áskerı qyzmetshilerdiń negizgi mindeti – kúndelikti qoǵamdyq tártip pen qaýipsizdikti qamtamasyz etý. Búgin biz jedel maqsattaǵy batalondardyń qys mezgilindegi qyzmeti jaıly sóz etpekpiz.
Qyzmetke shyǵatyn kúni áskerı jasaqtardyń baǵyttary aıqyndalyp, sarbazdar kıim-keshekterin aldyn ala saılap qoıdy. «As – adamnyń arqaýy» demekshi, qyzmet aldy kúsh jınap, jaqsylap aýqattanyp aldy. Qalashyq plasynda áskerı jasaqtar kezekshisi, patrýldik top bastyqtary men kóliktegi patrýlder jáne áskerı baǵdarlardyń daıyndyǵy, qural-jabdyqtarynyń bútindigi tekserildi. Qurama komandıri, polkovnık Nurlan Muhamedovten buıryq alǵan jeke quram bólimniń kólik parkine sappen bet aldy.
Bul ýaqytta qyzmettik tehnıkalardyń júrgizýshileri qala ishinde qozǵalý ruqsatnamalaryn alyp, janar-jaǵarmaıyn quıyp, tehnıkalyq ahýalyn tekserip, kólikti jylytyp jeke quramdy kútip turǵan bolatyn. Baǵyt – aýdandyq polısııa basqarmalary. Jarty saǵatta tıisti nysandarǵa jetken 1 jáne 2-jedel maqsattaǵy batalon jaýyngerlerine qalanyń Esil, Almaty aýdandaryndaǵy polısııa basqarmalarynyń basshylary qoǵamdyq tártipti qamtamasyz etýdi jáne qyzmet barysynda zańsyzdyqtarǵa jol bermeýdi, ózderine júktelgen mindetti úlken jaýapkershilikpen atqarýdy tapsyrdy.
– Qyzmet babynda túrli jaıttar oryn alyp jatady. Sonysymen de unaıdy. Sebebi keıde joǵalǵan zattardy taýyp alyp, ıelerine qaıtaryp, alǵysqa bólenesiń. Mundaı kúnderi kóńiliń kóterilip, keýdeńdi maqtanysh sezimi kerneıdi. Bir paıdaǵa jaraǵanyńa, jaqsylyq jasaǵanyńa, qyzmet ete júrip saýap jınaǵanyńa, bireýdiń shyn kóńilmen rahmet aıtqanyna qýanasyń. Endi birde urynyń izine túsip, qolǵa túsiremiz. Izdeýde júrgenderdi, sýyq qarýy bar azamattardy, nashaqorlardy, adam zorlamaq bolǵandardy quryqtaımyz. Iаǵnı buryn-sońdy dál mundaı mindet atqaryp kórmegen biz úshin bul úlken jaýapkershilik. Qysqasy, «Otan qorǵaýshy» sóziniń baıybyn túsinip jatyrmyz, – deıdi Bekzat Tańsyqbaı.
Bekzat Túrkistan oblysy Saryaǵash aýdany Qyzylásker aýylynyń týmasy. Qala tynyshtyǵyn qoryp júrgenine toǵyz aı bolypty. Al jasaqty basqarǵanyna jarty jyldan asqan. Áskerge keshe ǵana býyny qataıa qoımaǵan bozbala kúıde kelgen ol búginde eseıip, qaramaǵyndaǵy kómekshi patrýlderine jol kórsetip, óziniń úlkendigin tanytyp júr. Áskerı jasaq bastyǵynyń qoǵamda óz róli bar ekenin jaqsy túsinedi. Sózi nyq. Boıy tik. Mundaı qasıet pen qabilet tájirıbe men jaýyngerlik daıyndyqtyń nátıjesinde qalyptasady.
Qasyndaǵy patrýldiń biri qatardaǵy Ashat Tájen Qyzylorda qalasynan shaqyrylǵan eken. Buǵan deıin dál osy 5573 áskerı bóliminde Nurlan Qojahmet jáne Rýslan Qojahmet esimdi týys aǵalary 2015 jáne 2017 jyldary Otan aldyndaǵy boryshyn ótepti. Solardyń ásker týraly áńgimelerin, estelikterin estigen Ashat erterek sarbaz atanýǵa asyqqan kórinedi.
Jaýyngerlerdiń ýaqytyn almaıyq dep kelesi baǵytqa qaraı bet aldyq. Úshtikke endi jaqyndaı bergende, qasymyzǵa «Ulttyq ulan» degen jazýy men áskerı sımvolıkasy bar kólik kelip toqtady. Jasaq bastyǵy qolyn shekesine qoıyp, kólikten túsken áskerı qyzmetshige jaǵdaıdy baıandady. Sol kúngi áskerı jasaqtar boıynsha kezekshilik etip júrgen ofıser 4-jedel maqsattaǵy rotanyń komandıri kapıtan Rahat Ábiljanov eken.
– Jarty jyl saıyn bir shaqyrylym ketip, bir shaqyrylym kelip jatady. Jas sarbazdarymyz tájirıbeli jaýyngerge aınalǵanda, qatarǵa jańadan qosylǵandar áskerı istiń qyr-syrymen endi ǵana tanysa bastaıdy. Iаǵnı jeke quram jańaryp, ózgergenmen, jaýyngerlik qyzmet eshqashan toqtamaıdy. Olardyń qyzmetke tez beıimdelip, mindetin jetik meńgerýi, qalyptasý kezeńine tikeleı baılanysty. Oqý pýnktinde júrgende durys baǵyttap, atqaratyn mindetteriniń mańyzyn túsindire bilseń, qyzmetke oń oı, jaqsy kóńil kúımen attanýyna jaǵdaı jasasań nátıjesi de joǵary bolady, – deıdi Rahat Sábıtuly.
Aıta ketelik, 5573 áskerı bóliminiń jeke quramy Nur-Sultan qalasynyń ishki ister bólimderine ótken jyly ákimshilik quqyq buzýshylyq jasaǵan 4261 adamdy, qylmystyq belgileri bar 86 adamdy jetkizdi. Olardyń ishinde ishimdik iship, qoǵamdyq orynda tynyshtyq buzǵandar, usaq buzaqylyq jasaǵandar, el aýmaǵynda zańsyz, qujatsyz júrgender, izdeýde júrgender bar. Sondaı-aq áskerı jasaqtardyń kómegimen 36 urlyq, 5 tonaý, 6 buzaqylyq, 5 alaıaqtyq, 3 densaýlyqqa qasaqana nuqsan keltirý, 19 zańsyz esirtki tasymaldaý jáne qoldaný, 1 kólik urlaý, 1 soqqyǵa jyǵý, 5 bılik ókiline baǵynbaý, 4 bılik ókiline kúsh qoldaný faktisi ashylǵan. Profılaktıka degen osy.
Móldir NÁLIBAEVA,
aǵa leıtenant
