Rasynda, Qazaqstannyń aýqymdy terrıtorııasy eshkimnen syı retinde berilgen joq. Iаǵnı ata-babalarymyz kezinde bul ulan baıtaq dalany naızanyń ushymen, bilektiń kúshimen qorǵap, óz urpaqtaryna amanattaǵan bolatyn. Bul asa mańyzdy másele. Sondyqtan bul maqala aldaǵy ýaqytta el men jerimizge kóz tigemin deýshilerdiń barlyǵyna naqty jaýap boldy dep esepteımin. Mundaı jaıttar qaıtalana bermeýi tıis. Birligimiz ben tutastyǵymyzǵa, ıelik etip otyrǵan jerimizge eshkimniń de kóz tigýine qaqysy joq.
Árıne, bizdiń sózi men isinde, áreketinde alalyǵy joq kórshilerimiz kóp. Bárine birdeı topyraq shashqym kelmeıdi. Alaıda keı elderdegi nıeti burys neken-saıaq saıasatkerler memleketaralyq dostyq pen yntymaqtastyqqa nuqsan keltirip jatady. Oǵan osy kúni kózimiz anyq jetip otyr. «Aýmaqtyq tutastyǵymyzǵa kúmán keltirip, tatý kórshilik qatynastarǵa syna qaqqysy keletin keıbir shetel azamattarynyń arandatýshylyq is-áreketterine resmı jáne qoǵamdyq deńgeıde toıtarys bere otyryp, aǵartýshylyq jumystaryn ustamdylyqpen júrgizgen jón. Biz ulttyq múddeni aspen de, taspen de qorǵaýǵa daıyn bolýymyz qajettigin taǵy da basa aıtqym keledi», dedi Prezıdent.
Q.Toqaev aıtyp otyrǵandaı, ulttyq múddeni qorǵaýǵa halqymyz daıyn. Oǵan eshkim de kúmán keltirmeıdi. Memleket basshysynyń sózimen aıtatyn bolsaq, «Qazir kim ne aıtsa da, bizdiń ekijaqty kelisimdermen bekitilip, halyqaralyq deńgeıde tanylǵan shekaramyz bar. Endi oǵan eshkim daýlasa almaıdy».
Qasym-Jomart Kemeluly bir sózinde memlekettik tildiń aldaǵy ýaqytta ultaralyq tilge aınalatyny anyq ekenin aıtqan bolatyn. Prezıdent osy oıyn biz aıtyp otyrǵan maqalada taǵy da aıqyndap kórsetti. «Búginde memlekettik tildi biletin qazaqtyń da, ózge etnos ókilderiniń de úlesi edáýir artty. Qazaq tilin, shyn máninde, búkil halqymyzdy biriktirýshi faktorǵa aınaldyrýdyń barlyq quqyqtyq tásilderi jáne kepildikteri qalyptasty. Másele – nıette. Nıettiń durys bolýy qazaq tilin meńgergisi keletin adamdarǵa da, osy maqsatqa jetýge jaǵdaı jasaıtyn Úkimetke de baılanysty», dedi Memleket basshysy.
Memlekettik tildi bilý árbir otandasymyz úshin úlken mindetke, qasterli paryzǵa aınalýy tıis. Bul týraly Qasym-Jomart Toqaev «Memlekettik tildi bilý – Qazaqstannyń árbir azamatynyń paryzy. Mindeti dep te aıtýǵa bolady. Osy oraıda men barsha qazaqstandyqtarǵa, onyń ishinde qazaq tilin áli jete meńgermegen otandastaryma úndeý tastaǵym keledi. Jastar aǵylshyn tilin nemese basqa da tilderdi az ǵana ýaqytta meńgere alatynyn kórip otyrmyz. Tutas býyn almasqan osy jyldarda qazaq tilin úırengisi kelgen adam ony áldeqashan bilip shyǵar edi. Halqymyzda «Eshten kesh jaqsy» degen sóz bar. Eń bastysy, ynta bolýy kerek», dedi.
Rasynda, bizdiń jastarymyz shet tilin bir, bir jarym aıdyń kóleminde erkin meńgerip ketedi. Sondaı umtylys, tilek pen nıet qazaq tilin úırený kezinde de bolýy kerek. Memlekettik tilimiz halyqty biriktirýshi faktorǵa aınalatyn kúnge de birte-birte jaqyndap kelemiz. Osy maqsatta túrli qadamdar jasalynyp jatyr. Áli de jasalynatyn bolady.
Gennadıı ShIPOVSKIH,
Májilis depýtaty
