Adamdar baǵymyzǵa buıyrǵan jerimizge qanshalyqty jaýapty ekenimizdi áli de túsinbeı keledi. Alysqa barmaı-aq, byltyr elordanyń shetinde Kóbeıtuz kóline qatysty máseleni mysalǵa keltirsek jetkilikti. Bul oraıda qoǵamnyń ekologııalyq bilimin tereńdetý úshin jappaı tanymdyq is-sharalardy uıymdastyrýdy jolǵa qoıǵan artyq bolmas dep oılaımyn. Tutastaı bul baǵyttaǵy aǵartýshylyq jumysty bilim ordalarynan bastap, jekelegen kompanııalarda júrgizgeni abzal. Álbette, tárbıe tal besikten bastalady. Sondyqtan tabıǵatymyzdy aıalaýdy, ásirese, jastardyń boıyna jastaıynan sińirgen durys. О́ıtkeni «Uıada ne kórseń, ushqanda sony ilesiń» dep beker aıtylmasa kerek. Bul rette ekologter bolsyn, qoǵam belsendileri, tutastaı aınalamyzda bolyp jatqan qubylystarǵa beıjaı qaramaıtyn azamattar Jer planetasy bizdiń ortaq úıimiz ekenin jan-jaǵyndaǵy adamdarǵa túsindirýi tıis. Túsinemin, bul uran retinde estilýi múmkin. Alaıda bul máselege mán berip, durystap nazar aýdarylsa eken deımin. Áli esimde, mektepte oqyǵanda «Jas natýralıster» úıirmesi bolatyn. Onda muǵalimderimiz balalardy arnaıy mekemelerge aparyp, kez kelgen ósimdikterdi qalaı kútip, ósirý kerektigi jaıly sabaqtar júrgizetin. Osylaısha, jas balanyń túsiniginde qorshaǵan ortaǵa qatysty kózqarasy qalyptasyp, jastaıynan áleýmettik jaýapkershiligi qalyptasady.
Ásel ISANOVA,
«Tamyr» jabaıy tabıǵattaǵy mektebiniń negizin qalaýshy, ekologııalyq belsendi
