Qalyń eldiń qabyrǵasyn qaıystyrdy

Orny tolmas qaıǵy qaraorman qa­zaq­ty teńseltti. Memleket basshysy Qasym-Jomart Toqaev Jańatas qala­syn­daǵy oqıǵaǵa baılanysty Ábdi­má­li­kov­ter otbasynyń qaıǵysymen bólisip, qaza bolǵan balalardyń ata-anasy men týystaryna kóńil aıtý jedelhatyn joldady. Prezıdent bul jaǵdaıdy bir ǵana otba­synyń emes, búkil elimizdiń basyna tús­ken tragedııa dep sanaıtynyn aıta ke­lip, balalardyń ata-anasyna jan-jaq­ty kómek kórsetýdi tapsyrdy.

Qaıǵyly oqıǵanyń sebebin anyqtaý úshin Jambyl oblysynyń ákimi Berdibek Saparbaevtyń tapsyrmasymen arnaıy komıssııa quryldy. Oqıǵa oryn alǵan kúni atalǵan komıssııa tóraǵasy, oblys ákiminiń orynbasary Ulan Jazylbek, oblys prokýrory Nurǵalym Ábdirov, oblystyq polısııa departamentiniń bastyǵy Janat Súleımenov jáne oblystyq tótenshe jaǵdaılar departamentiniń basshysy Ermek Mombaev shuǵyl túrde Jańatas qalasyna attandy. Sondaı-aq jedel top, jyljymaly órt-tehnıkalyq zerthana, órt sóndirý qyzmeti men apattyq-qut­qarý qyzmetiniń psıhologteri de oqıǵa ornyna bardy. Jalpy, komıssııa qu­ramyna proký­ratýra, polısııa de­par­ta­menti, tótenshe jaǵ­daılar de­par­ta­menti men basqa da múd­deli mem­le­­ket­tik organdardyń ókil­deri engen. Oqıǵa ornynda órt sóndirý ­qy­z­metiniń 6 qyz­met­keri men 1 tehnıka ju­mys atqardy. Sol kúni órt tolyǵymen aýyzdyqtaldy.

 Araǵa bir kún salyp, Jańatas qala­syn­da oryn alǵan jantúrshigerlik oqıǵanyń sebepteri anyqtaldy. Qala­daǵy turǵyn úıden shyqqan órt oqı­ǵa­sy tez tutanǵysh materıaldyń betine ashyq ot kóziniń túsýi saldarynan týyn­daǵan. Atalǵan máselege oraı, óńir­lik kommýnıkasııalar qyzmetiniń aqpa­rat alańynda brıfıng ótip, jıynda Jam­byl oblystyq polısııa departamenti bas­ty­ǵynyń birinshi orynbasary Baqyt Rataev órt faktisi boıynsha Qazaqstan Respýblıkasy Qylmystyq kodeksiniń 292-babynyń 3-bóligi, órt qaýipsizdigi talap­taryn buzý boıynsha sotqa deıingi tergeý bastalǵanyn málimdedi. «Sot-saraptama ortalyǵy mamandarynyń aldyn ala málimetteri boıynsha, ólim ýly gazdan ýlanýdan, al órttiń ashyq ot kózi tu­tanǵysh materıaldyń, ıaǵnı tósektik oryn jabyndarynyń betine tıgeninen bol­ǵan. О́rt­tiń qorytyndy sebepteri bar­lyq qa­jet­ti saraptamalardyń nátıje­le­ri bo­ıynsha jarııalanatyn bolady», dedi Baqyt Rataev.

 Sonymen qatar Jambyl oblystyq tótenshe jaǵdaılar departamentiniń bas­shysy Ermek Mombaev órt-teh­nı­ka­lyq zerthanasynyń aldyn ala zertteý málimetterin jarııalady. «О́rt bes qa­bat­ty turǵyn úıdiń úshinshi qaba­tyn­da­ǵy úsh bólmeli páterde oryn aldy. Ot bala­lar bólmesinde tutanǵan. Jalyn 16 sharshy metr aýmaqty qamtyǵan. Jyljymaly órt-tehnıkalyq zerthanamen zertteý júrgizý kezinde oqıǵa ornynda janǵan symdar men elektr jabdyqtary, pesh nemese basqa da qosymsha jylytý qu­raldary tabylmady. Úı ortalyq jy­ly­týǵa qosylǵan», dedi Ermek Mom­­baev. Al oblys ákiminiń orynba­sary Ulan Jazylbek zardap shekken otbasyna barlyq qajetti kómek kór­se­ti­letinin atap ótti. «Oqıǵanyń bar­lyq mán-jaıyn anyqtaý úshin oblys áki­mi­niń ókimimen komıssııa quryldy. Onyń quramyna jergilikti atqarýshy organ­dar­dyń, prokýratýranyń, polısııa de­partamentiniń, tótenshe jaǵdaılar  de­par­tamentiniń jáne basqa da jaýapty memlekettik organdardyń ókilderi endi. Komıssııa músheleri qaıǵyly oqıǵa or­nynda bolyp, jumys júrgizýde. Biz­diń tarapymyzdan barlyq qajetti kómek kór­setiledi. Sonyń ishinde psı­ho­lo­gııa­lyq kómekti jáne jerleý rásimin uıymdastyrýǵa qolushyn beremiz», degen Ulan Jazylbek qara jamylǵan otbasyna kóńil aıtty. Ákim orynbasarynyń aıtýynsha, otbasy tolyqqandy. Balalardyń ákesi Jańatas qalasynda jumys isteıtin bolsa, anasy muǵalim bolyp eńbek etedi. Alaıda qazirgi ýaqytta dekrettik demalysta eken. Sondaı-aq Ulan Jazylbek áleýmettik jelilerde tarap ketken órtten zardap shekken 60 jastaǵy áıel týraly qaýesetti joqqa shyǵardy. «Bul aqparat shyndyqqa janaspaıdy. Basqa zardap shekkender joq», dedi ol.

Oqysta oryn alǵan qaıǵyly oqıǵa kópshiliktiń qabyrǵasyn qaıystyryp, júregin jylatty. Senbi kúni órtten qaza bolǵan balalardy Talas aýdany, Úsharal aýylynda jerleý rásimi ótti. Qaraly jıynǵa arnaıy kelgen oblys ákimi Berdibek Saparbaev Ábdimálikovter otbasyna Memleket basshysynyń kóńil aıtý jedelhatyn jetkizip, qaza bolǵan balalardyń ata-anasyna, jaqyndaryna basý aıtty. Ákim Prezıdent tapsyrmasyna oraı, balalardyń ata-anasyna jan-jaqty kómek kórsetiletinin jet­kiz­di. Marqumdardyń janazasyn Qa­zaqstan musylmandary dinı basqar­ma­synyń Jambyl oblysy boıynsha ókil ımamy Beıbit Myrzageldıev oqyp, jurtshylyqty sabyrǵa shaqyrdy. Biraq baǵa jetpes baılyqtyń ornyn eshkim toltyra almasy anyq. Tilsiz jaý­dyń tutqynyna túsip, tylsym álem­ge beıýaqytta kóship kete barǵan bala­lar­­dyń beıkúná janary, kirshiksiz taǵ­dyry ár qazaqtyń júreginde óshpes óki­nish, tarqamas muń bolyp qaldy. Baqı­ǵa beımezgil bet túzegen bes birdeı bal­dyr­ǵan­dy joqtaǵandaı, sol kúni aspan da jylap turyp aldy...

Jambyl oblysy