Búginde kásiporyndardyń tarapynan jumysshy mamandarǵa qoıylatyn talaptar artýda. Sebebi kásiporyn damyǵan saıyn óziniń jabdyqtaryn únemi jańartyp otyrady, bul óz kezeginde kolledjden kelgen jas mamandar úshin belgili bir qıyndyqtar týyndatady. Atap aıtsaq, óndiriste qoldanylyp jatqan jabdyqtyń kolledjde bolmaýy. Endeshe, tehnıkalyq jáne kásiptik bilim berý uıymdaryn zamanaýı qondyrǵylarlarmen jabdyqtaý búgingi mańyzdy máselelerdiń biri.
«Osy rette, Elbasynyń tapsyrmasymen júzege asyrylyp jatqan «Jas maman» jobasy jumysshy kadrlardy sapaly daıarlaýdyń júıeli quraly dep oılaımyn. «Jas maman» jobasy elimizdiń 180 kolledjin jańǵyrtýdy, ıaǵnı olardy zamanaýı jabdyqtar jıyntyǵymen jabdyqtaýdy kózdeıdi. Onyń ishinde halyqaralyq WorldSkills qozǵalysynyń standarttary da eskerilip otyr. Jobany júzege asyrý boıynsha Talap KeAQ tarapynan tıisti jumystar júrgizilýde. Joba aıasyndaǵy kolledjderdi konkýrstyq irikteý jumystarynyń nátıjesinde, 2020 jyly «Jas maman» jobasyna elimizdiń ár aımaǵynan 80 kolledj iriktelip alyndy. Osy oraıda jabdyqtardy alý rásimin qysqasha aıtyp ótsek, tizimge engen kolledjder zamanaýı jabdyqtardy alý úshin áleýmettik seriktes – berýshilermen kelise otyryp óz aımaǵynda básekege qabiletti mamandardy daıarlaý úshin qajetti jabdyqtardyń tizimin quraıdy», deıdi Talap KeAQ-nyń vıse-prezıdenti Qajymuhan Álimhanuly.
Atalǵan jabdyqtar quramyn aımaqtyq komıssııada qarastyryp bekitedi, komıssııanyń kem degende 50%-y jumys berýshilerden jáne kásipkerlerden quralǵan, sonymen qatar «Atameken» óńirlik kásipkerler palatasy da bar. Ár aımaq quralǵan jabdyqtar tizimin Talap KeAQ-qa jiberedi.
«Biz operator retinde barlyq jabdyqtar tizimin «Atameken» UKP jáne salalyq jumys berýshilerdiń qaýymdastyǵyna kelisýge joldaımyz. Atalǵan mekemelerden kelisim alynǵannan keıin jabdyqtar tizimi respýblıkalyq komıssııa deńgeıinde qarastyrylyp, bekitiledi. Bekitilgen tizimge sáıkes kolledjder belgilengen tártipte satyp alý jumystaryn júrgizedi. Nátıjesinde, ótken jyly elimizdiń 80 kolledji mamandardy daıarlaý baǵyty boıynsha zamanaýı jabdyqtardy satyp aldy. Atap aıtsaq, jeńil ónerkásip, aspaz, mashına jasaý, avtokólikterdi jóndeý, aýyl sharýashylyǵy, IT mamandyqtary boıynsha, sonymen qatar mehatronıka sekildi jańa saladaǵy jabdyqtar da bar», deıdi ol.
Qazirgi kúni zamanaýı qondyrǵylarmen jabdyqtalǵan kolledjder óz bazalarynda quzyrettilik ortalyqtaryn ashý jumystaryn júrgizýde. Bıyl «Jas maman» jobasynyń sheńberinde 100 kolledjdi zamanaýı qondyrǵylarmen jabdyqtaý josparlanǵan. «Jas maman» jobasynyń tıimdiligin arttyrýdyń ekinshi baǵyty – jańadan alynǵan jabdyqtarda bolashaq mamandardy daıarlaý úshin jańa bilim berý baǵdarlamalaryn engizý. Osy oraıda jobaǵa qatysýshy kolledjderde halyqaralyq deńgeıde maquldanǵan jumysshy kadrlardy daıarlaýdyń baǵdarlamalaryn engizý kózdelip otyr.
Álemdegi, ekonomıkadaǵy, qoǵamdaǵy úzdiksiz ózgerister jaǵdaıynda kadrlar daıarlaý júıesin únemi jańǵyrtyp otyrý qajet, óıtkeni dástúrli formattar eskirýde. О́z kezeginde, óndiristiń transformasııasy kadrlardyń kásibı daǵdylarynyń ózekti bolýyn, zamanaýı qurylǵylarda jumys isteı alýyn únemi qajet etip turady. «Jas maman» jobasyn júzege asyrý nátıjesinde elimizdegi kolledjderdegi «qondyrǵylar parki» jańartylyp, óz kezeginde bilikti mamandardy daıarlaý boıynsha jumystardyń jandanýyna, sondaı-aq jumys berýshiniń talabyna saı bolýyna ákelýde. Qazaqta «Sheberdi qoly asyraıdy» degen jaqsy sóz bar. Árbir jumysshy maman óz isiniń sheberi bolsa, sózsiz eńbek naryǵynda joǵary suranysqa ıe. «Jas maman» jobasynyń oń nátıjesi aldaǵy bes jyldyń kóleminde kórinedi degen senim bar», dedi Q.Álimhanuly.
