Ol óńirge sapary barysynda oblys aýdandarynyń turǵyndaryn aýyz sýmen qamtamasyz etetin «Kaspıı» sý tushytý zaýytynyń jumysymen tanysty. Aýyz sý máselesi óńir úshin asa mańyzdy ekeni belgili. Senat Tóraǵasy osyǵan baılanysty atalǵan máseleni sheshý úshin qosymsha sý tushytý nysandaryn salý qajettigine nazar aýdaryp, Úkimettiń keıingi keńeıtilgen otyrysynda Memleket basshysy halyqty sapaly aýyz sýmen qamtamasyz etýge erekshe nazar aýdarǵanyn atap ótti.
Máýlen Áshimbaev elimizdiń birqatar óńirindegi, sonyń ishinde Mańǵystaý oblysynyń fermerleri tap bolyp otyrǵan qurǵaqshylyq pen mal shyǵyny problemalaryn da kóterdi. Senat Tóraǵasy bul másele el Prezıdenti Qasym-Jomart Toqaevtyń erekshe baqylaýynda ekenin, zardap shekken fermerler men aýyl turǵyndaryn qoldaý jóninde Úkimet pen ákimderdiń keshendi sharalar qabyldap jatqanyn aıtty.
«Elimizdiń Prezıdenti fermerlerdi qoldaý úshin Úkimet rezervin paıdalanýdy tapsyrdy. Úkimet pen ákimderge «Báıterek» holdıngimen birlese otyryp, fermerlerdi jemshóppen qamtamasyz etý jóninde qajetti keshendi sharalardy jedel túrde ázirleý tapsyryldy. Memleket basshysynyń tapsyrmalaryn iske asyrý jaǵdaıdy turaqtandyrýǵa jáne elimizdegi sharýalardy qoldaýǵa baǵyttalǵan», dedi Máýlen Áshimbaev.
Senat Tóraǵasy Memleket basshysynyń tapsyrmasy boıynsha Úkimet jemshópke, mal azyǵyn jınaý jabdyqtaryna qosymsha sýbsıdııa bólý jáne qolaıly óńirlerden mal azyǵyn forvardtyq túrde satyp alý úshin fermerlerdi jeńildikpen qarjylandyrýdy qamtamasyz etý jóninde sharalar qabyldaıtynyn atap ótti.
Máýlen Áshimbaev qurǵaqshylyq qaıtalanatyn tabıǵı qubylys ekenine toqtaldy, sondyqtan el Prezıdenti atap ótkendeı, jedel sharalardan basqa, salany azyqpen qamtamasyz etýdi arttyrý boıynsha júıeli sharalar ázirlenýi qajettigi aıtyldy.
Máýlen Áshimbaev sapar barysynda balyq jáne nan zaýyttarynyń jumysymen de tanysty. Ol nysandarda bolǵan kezde Senattyń zań shyǵarý jumysy jaıly, pandemııa kezinde azamattar men kásipkerlikti qoldaý jóninde qabyldanǵan zańdar týraly aıtty.
Senat Tóraǵasy sol kúni Ábish Kekilbaev atyndaǵy mádenı ortalyqta boldy.
«Ábish Kekilbaevtiń 80 jyldyq mereıtoıyna Memleket basshysy arnaıy kelip, osy ortalyqty ashqan bolatyn. Kórnekti jazýshy jáne memleket qaıratkeri Ábish aǵa – halqymyzdyń rýhanı damýyna, sondaı-aq elimiz Táýelsizdiginiń nyǵaıýyna eleýli yqpal etken tulǵa. Sondyqtan onyń esimin máńgi este qaldyrý – bizdiń ortaq mindetimiz», dedi Máýlen Áshimbaev.
