Senat pen oblystyq máslıhattar depýtattarynyń ózara is-qımylyn nyǵaıtýdyń mańyzy zor. Senator Dúısenǵazy Mýsınniń Shyǵys Qazaqstan oblystyq máslıhatynyń basshylyǵymen kezdesýi barysynda osy másele týraly aıtyldy. Senat depýtaty zań jobalaryn sapaly pysyqtaý jáne jergilikti jerlerdegi problemalardy júıeli sheshý úshin birlesken jumys qajet ekenin atap ótti.
4-shi deńgeıdegi bıýdjetti ıgerý jáne aýyldyq aýmaqtardy damytý máseleleri – solardyń biri. Bul jóninde Dúısenǵazy Mýsın oblystyq Ekonomıka jáne bıýdjettik josparlaý basqarmasynyń qyzmetkerlerimen kezdesý barysynda áńgime qozǵady.
Senator sondaı-aq Rıdder qalasynda bolyp, onda iri orman órtinen zardap shekken turǵyndarǵa arnalǵan úıler qurylysynyń barysymen tanysty. Ol qurylys sapasyn qamtamasyz etýdiń mańyzdylyǵyna merdigerlerdiń nazaryn aýdardy, sondaı-aq 32 turǵyn úıdiń qurylysy joǵary qarqynmen júrip jatqanyn atap ótti. Depýtat qalanyń áleýmettik mańyzy bar nysandarynyń qurylys alańdarynda da boldy.
Dúısenǵazy Mýsın qala ákimimen kezdesý barysynda Semeı qalasynyń áleýmettik-ekonomıkalyq damýynyń negizgi máselelerin talqylady. Depýtat óńirdegi sapary barysynda jáne halyqpen kezdesýleri kezinde kóterilgen barlyq másele zań shyǵarý qyzmetinde paıdalanylatynyn aıtty.
Senat depýtaty Sultan Dúısembınov Almaty oblysynyń Taldyqorǵan qalasynda boldy. Ol kóppáterli turǵyn úıdiń qurylysymen jáne qalalyq ortalyq qazandyqtyń qaıta jóndelý barysymen tanysyp, qurylys jumystarynyń sapasyn qatań baqylaý qajettigine jergilikti atqarýshy organdardyń nazaryn aýdardy.
Sultan Dúısembınov sondaı-aq Erkin aýylyndaǵy dárigerlik ambýlatorııa ujymymen kezdesti. Ol halyqtyń ál-aýqatyn arttyrý maqsatynda qabyldanǵan jańa zańdar týraly aıta kelip, koronavırýs ınfeksııasynyń aldyn alý sharalarynyń mańyzdylyǵyna toqtaldy.
«Koronavırýs pandemııasymen kúres taqyrybyn tosyrqamaı, vaksınalaý júrgizýge erekshe nazar aýdaryp, halyqqa únemi aýqymdy túsindirý jumystaryn júrgizý qajet», dedi Sultan Dúısembınov.
Senat depýtattary Narıman Tóreǵalıev pen Lázzat Rysbekova Batys Qazaqstan oblysyndaǵy Syrym, Terekti jáne Báıterek aýdandarynyń sharýa qojalyqtarynda bolyp, olardyń basshylarymen jáne qyzmetkerlerimen kezdesti.
Senatorlar fermerlermen júzdesý kezinde jemshóp daıyndaý jumystarynyń barysyn talqylady. Kezdesý barysynda jemshóp jınaıtyn tehnıka baǵasynyń ósýi máselesi kóterildi. Depýtattar bul másele el basshylyǵynyń baqylaýynda ekenin jáne senatorlar óz tarapynan týyndaǵan problemalardy sheshýge belsendi túrde járdemdesetinin aıtty. Fermerler sonymen qatar sýbsıdııalar berý erejeleri jıi ózgerip otyratyndyǵyna da alańdaýshylyq bildirdi. Bul aýyl sharýashylyǵy taýar óndirýshileri úshin qolaısyzdyqtar týǵyzady jáne óz qyzmetin josparlaýǵa múmkindik bermeıdi. Depýtattar bul máseleni Senatta qaraýǵa ýáde berdi.
Narıman Tóreǵalıev pen Lázzat Rysbekova Bórli jáne Shyńǵyrlaý aýdandarynda da boldy. Senatorlar aýyl turǵyndarymen kezdesý barysynda olarǵa ótken sessııa barysynda qabyldanǵan zańdardyń negizgi erejeleri týraly aıtyp berdi. Depýtattar sondaı-aq jol, kóppáterli úı jáne sport kesheni qurylystarynyń barysymen tanysty.
Depýtattardyń óńirlerge sapary aıasynda senatorlar Nurtóre Júsip pen Sultanbek Mákejanov ál-Farabı atyndaǵy Qazaq ulttyq ýnıversıtetinde boldy. Depýtattar sapar barysynda joǵary oqý ornynyń ǵylymı-oqytýshylyq quramymen jáne basshylyǵymen kezdesip, ýnıversıtettiń materıaldyq-tehnıkalyq bazasymen tanysty.
Nurtóre Júsip kezdesý barysynda ótken sessııada qabyldanǵan, el azamattarynyń ómir súrý sapasy men ál-aýqatyn jaqsartýǵa, bilim men ǵylym salasyn damytýǵa baǵyttalǵan zańdar týraly pedagogterge aıtyp berdi.
Sultanbek Mákejanov joǵary oqý oryndary men joǵary oqý ornynan keıingi bilim berý uıymdarynda zań biliminiń sapasyn arttyrý jónindegi óz usynystaryn bólisti.
Senatorlar sondaı-aq qazirgi pandemııa jaǵdaıynda ózekti máselelerdi ýaqtyly taldaý, oqý oryndarynyń erekshelikterin eskeretin neǵurlym ońtaıly sharalardy qabyldaý jáne bilim berý júıesine qatysýshylardyń bárin – oqýshylardy, ata-analardy, pedagogterdi qoldaý – bilim berý salasynyń basty mindetteriniń biri ekenin atap ótti.
