Bıylǵy birinshi jartyjyldyqta sement tıeý 2020 jyldyń osy kezeńimen salystyrǵanda 9% kóbeıip, 4,3 mln tonnaǵa jetti. Qazaqstan boıynsha 3,3 mln tonna júk tasymaldansa, onyń 830 myń tonnadan astamy elordaǵa jetkizildi. Bul kórsetkish byltyrǵy 6 aıdaǵy tasymal kólemine qaraǵanda 43% artty. Bıylǵy qańtar-maýsym aılarynda 7 mln tonnadan astam qurylys júkteri tıelgen. Onyń basym bóligi, ıaǵnı 6,8 mln tonnasy el ishinde tasymaldandy.
«Sement jáne basqa da qurylys materıaldaryn tasymaldaý boıynsha barlyq ótinishter tolyqtaı qamtamasyz etilýde. Vagon tapshylyǵy joq, biraq bul rette qoldanystaǵy parkpen tıimdi ári utymdy jumys isteý qajet», dedi jıynda sóz alǵan «QTJ – Júk tasymaly» JShS atqarýshy dırektory Nurjan Kelbuǵanov.
Qazirgi ýaqytta Qazaqstan magıstraldyq jelisinde 65 myńnan astam ashyq vagon bar, onyń 23 myńnan astamy – «Qaztemirtrans» AQ menshiginde. Qalǵany jeke operatorlar men kórshi memleketterge tıesili. Qurylys júkterin tasymaldaýǵa «Qaztemirtrans» AQ parki: 10 myńnan astam ashyq vagon, 7,3 myńnan astam jabyq vagon, 72 platforma jumyldyrdy. Qazaqstan aýmaǵynda 4,5 myńnan astam hopper-sement tasyǵysh bar, olar negizinen jekeniń qolynda. Tek 668 sement tasyǵysh «Qaztemirtrans» AQ balansynda.
«QTJ – Júk tasymaly» JShS-da júk tıelgen jáne bos vagondardyń júrip-turýyna táýlik boıǵy baqylaý ornatylǵan. Qurylys zattaryn qabyldap alýshylardyń júkterdi der kezinde túsirip almaýynan stansalyq jáne kirme joldarda kólik jıi turyp qalatyn boldy. Sondyqtan atqarýshy dırektor júk operasııalaryndaǵy tehnologııalyq normalardy saqtaý kerektigin eskertti. Sement jáne jalpy qurylys júkterin tasymaldaý boıynsha máselelerdi jedel sheshý úshin «QTJ – Júk tasymaly» JShS messendjerde chat jumys isteıdi, oǵan iri sement zaýyttarynyń ókilderi, júk jóneltýshiler men júk alýshylar kiredi.
Keńes barysynda shalǵaı stansalarda júk tıelgen vagondarmen jumys isteý úshin manevrlik lokomotıv berý máselesi sheshimin tapty. Sement, sılıkat kirpishi bar vagondardyń uzaq ýaqyt turyp qalý faktileri erekshe baqylaýǵa alyndy.
Onlaın-keńesti qorytyndylaı kele, Nurjan Kelbuǵanov osyndaı keń formattaǵy kezdesýler turaqty bolatynyn atap ótti.
«Egemen-aqparat»
