Sátbaev qalasynyń alǵashqy ákimderiniń biri, marqum Serik Mákenuly Tóregeldın degen kisi boldy. Ol osy músinge qatysty kezinde mynandaı áńgime aıtqan bolatyn.
– Men ol kezde Halyq depýtattary qalalyq keńesi atqarý komıtetiniń tóraǵasy edim. Maǵan bir kisi telefon shalyp, qalanyń óndiristik aýmaǵynda ornalasqan qoımalardyń birindegi aǵash jáshiktiń ishinen Qanysh Sátbaevtyń músini shyqqany týraly habarlady. Dereý jetip bardym. Shynynda da, nán jáshiktiń ishinde Qanekeńniń músini tur eken. Qashan, qaıdan kelgeni belgisiz. Keıin bilsem, Jezqazǵan taý-ken kombınatynyń basshylyǵy ǵalymnyń mereıtoıy qarsańynda tapsyrys berip jasatqan kórinedi. Biraq oblystyq partııa komıteti tarapynan qoldaý bolmaǵan soń, qalaı ákelindi solaı qoımada qalyp qoıǵanǵa uqsaıdy. Qaıta qurýdyń jeli esip turǵanyn paıdalanyp,músindi qoımadan shyǵaryp, biraq eshqandaı sán-saltanatsyz qaladaǵy Q.Sátbaev kóshesiniń aıaq jaǵyna aparyp ornattyq. Arada birer jyl ótken soń, naqtyraq aıtqanda, 1989 jyly sol kezdegi Jezqazǵan oblysynyń basshylyǵy qalaǵa arnaıy kelip, ǵalymnyń týǵan kúninde, onyń 90 jyldyǵy qurmetine músinniń saltanatty ashylýyn jasap ketti, – degen edi S.Tóregeldın.
Tuǵyry tapaltaqtaý kelgen músin kórer kózge qorashtaý kórinetin ári ornalasqan jeri de kóńilden shyǵa qoımaıtyn. Osyny eskergen qalanyń burynǵy ákimderiniń biri Qanat Balmaǵambetov bıik tuǵyr jasatyp, músindi qala ákimdigi ǵımaratynyń aldyna ákelip ornatty. Músinniń aınalasy jaınaǵan gúlge toly qalanyń tórine qoıylǵany kópshilikti tánti etti. Biraq...
2014 jyly týǵanyna 115 jyl tolýyna oraı qalada ǵalymnyń eńseli eskertkishin ornatý qolǵa alyndy. Bul eskertkish ákimdik janyndaǵy alańǵa qoıylatyn boldy da, «eki birdeı eskertkishtiń qatar turýy jaraspaıdy» degen uıǵarym jasalyp, ákimdiktiń aldynda turǵan músin ornynan alynyp, saqtaý úshin taǵy da áldebir qoımaǵa aparyp qoıyldy. Onyń qaıda aparyp qoıylǵanyna eshkim qyzyǵýshylyq tanyta qoımady. Tek 2018 jyly qalanyń sol tustaǵy ákimi Asqar Abylaıuly Ydyrysovtyń bastamasymen músin qalalyq halyqqa qyzmet kórsetý ortalyǵynyń aldyndaǵy alańqaıǵa saltanatty jaǵdaıda ornatyldy. Bul óte oryndy bolǵan edi.
Kezinde Qanysh Imantaıuly Sátbaevtyń esimin kóleńkede qaldyrý áreketteri bolǵany da tarıhtan málim. Sol solaqaıshyldyq onyń ózine ǵana emes, músinine de salqynyn tıgizgeni adam senbes jaǵdaı, biraq aqıqaty solaı. Ýaqyt alǵa jyljydy. Kóp nárse ornyna keldi. Kezinde qoımadan tabylǵan músin qazir halyqtyń ǵalym rýhyna degen adaldyǵynyń belgisindeı qalanyń ortalyǵyndaǵy akademık Q.Sátbaev dańǵyly boıyndaǵy asqaq tuǵyrda menmundalap tur.
Ulytaý oblysy,
Sátbaev qalasy
