Sýret: hrono.ru
– Mórhanǵa «saýap» boldy. Áıel, bala-shaǵasy qup qatyrdy ony, – dedi birinshisi ázil yńǵaıynda.
– Aıtpa... Endi ol ne isteıdi eken? – dedi ekinshisi jymııa.
– Bilmedim...
– Tosynsyıdy tapsyryp jatqandaǵy Mórhannyń túrin kórip janym ashyp ketti. Qyzaraqtap, yrjalaqtap... Ne bolsa da syılyq ataýy jazylǵan sertıfıkatty ustaǵanda qoldary dirildep, quty qashqanyn baıqatyp aldy ol.
– Iá, qıyn ǵoı... Ishi qý, árneden habary mol Mórhan armandamaǵan, qalamaǵan tosynsyıdy aýyr qabyldady.
– Bul tartýdyń sońynda úlken jaýapkershilik, ony oryndaý mashahaty bar ekenin jaqsy biletin oǵan, árıne qıyndaý. Nápsisine aýyr tıeri sózsiz.
– Negizi, álgi syılyqty berýdi uıymdastyrǵan áıeli dep oılaımyn.
– Men de solaı esepteımin.
– Kim uıymdastyrsa da ony aıyptaýǵa bolmas. О́ıtkeni, aýzy araqtan bosamaıtyn, otbasynyń berekesin úrkitýden talmaı kele jatqan Mórhannyń betin ımanǵa burý, namazǵa jyǵý amaly ǵoı bul.
– Iá, ilgeri nıet, ilkimdi oı deseıshi. Qasıetti Qaǵbany kórip, Mekke topyraǵyn basyp kelse, qajy atansa ońdy jolǵa túsip, ornymen júrip-turýǵa bet burýy da ǵajap emes qoı.
– Áı, qaıdam... Mundaı tosynsyıǵa ıe bolǵandardyń talaıyn kórgenbiz. Ondaılar qajylyqqa baryp kelgen soń eki-úsh aı tápsisin qolynan tastamaı, aýzynan «bissimillási» men «álhamy» túspeı júredi de keıinnen baıaǵy jyryn qaıta jyrlap ketedi. Qudaı mazaq, Mekke ermek pe bul qazaqqa?
– Bárin Qudaı biledi. Bálkim, Mórhan bul sapardan keıin es kirip, týra jolǵa túsip keter. Laıym solaı bolǵaı.
– Biz tym artyq sóılep ketken joqpyz ba? Beıne bir ózimiz týra jolda júrgendeı...
Ekeýi de únsiz qaldy. Sózdi birinshisi jalǵady.
– Mórhanǵa kúlmeıik. «Kúlme dosqa, keler basqa» degen bar. Erteń dál osyndaı tosynsyı top etip aldymyzdan shyǵyp tursa qaıtemiz?
Suraq jaýapsyz qaldy. Eki qurdas qoshtasty da óz úılerine qaraı burylyp ketti. Ekeýi de túnimen uıyqtaı almaı shyqty. Olardyń alpys jyldyq mereıtoılary kelesi aıda birinen keıin biri bolatyn edi. Bar oılary: «Mórhannyń kebin kıip júrmesek jarar edi».
Jurt «Halal» toı dep ataıtyn jıyndy aq sháýgimge jasyryla quıylyp erkin aralaıtyn «aq shaı» – jyndy sýdan eptep-eptep urttap qaıtqan ekeý Mórhan alǵan tosynsyıdyń ózderine buıyrmaýyn Táńirden tiledi. Bul ne, Qudaı aldyndaǵy jaýapkershilikterin tereń seziný me?
Ekeýiniń de ózderin aqtap alatyn sózderi kóp edi.
Armandamaǵan, qalamaǵan tosynsyı talaılardy kútip tur... Sol úshin nıetimizdi túzep júreıik, aǵaıyn. Áıtpese...
