Astana sammıtin ótkizý – zor jaýapkershilik

Aqordada Memleket basshysy Nursultan Nazarbaev Astanada EQYU Sammıtin ótkizýge daıyndyq máseleleri jóninde jumys keńesin ótkizdi, dep habarlady Qazaqstan Respýblıkasy Prezıdentiniń baspasóz qyzmeti. Oǵan Senat Tóraǵasy Q-J.Toqaev, Má­ji­lis Tóraǵasy O.Muhamedjanov, Premer-Mı­nıstr K.Másimov, Memlekettik hatshy – Syrtqy ister mınıstri Q.Saýdabaev, Pre­zı­dent Ákimshiliginiń Basshysy A.Mýsın, “Nur Otan” HDP Tóraǵasynyń birinshi oryn­ba­sary N.Nyǵmatýlın, Parlament depýtat­ta­ry, Úkimet músheleri, Astananyń jáne Qaraǵandy oblysynyń ákimderi qatysty. Bıylǵy jyldyń 3 tamyzynda EQYU-ǵa múshe memleketterdiń Syrtqy ister mınıstr­leri keńesi Astanada 2010 jylǵy 1­­-2 jel­toq­sanda osy iri halyqaralyq uıymnyń Sam­mı­tin ótkizý týraly naqty sheshim qabyl­da­dy. Bul búkil postkeńestik keńistik deń­geıin­de alǵashqy iri aýqymdy shara bolyp taby­la­dy. Elimizge 55 memlekettiń, 65 halyq­aralyq uıymnyń basshylary, delegasııa­larǵa erip júrýshiler, baspasóz ókilderi – barlyǵy birneshe myń qonaq keledi. Keńes barysynda Prezıdent osy tarıhı kezdesýdi mazmundy ári joǵary deńgeıde uıymdastyrý jáne ótkizý úshin úlken jumystar kútip turǵanyna toqtalyp ótti. Joǵary deńgeıde Sammıtti ótkizý, eli­miz­di kórsetý jáne jas astanada osyndaı fo­rým­dy ótkizý múmkindigi – biz úshin úlken qur­met jáne zor jaýapkershilik, – dedi N.Nazarbaev.