Jambyldyń jampozy – Olımpıada chempıony!

Er qýanyshy – el qýanyshy! Jasóspirimder arasyndaǵy tuńǵysh jazǵy Olımpııa oıyndarynda Taraz qalasynyń týmasy, jas balýan Já­nibek Qandybaev 69 kg. salmaqta tórt ret kilemge shyǵyp, el sportshy­la­rynyń atynan alǵashqy altyn me­dal­ǵa ıe boldy degen qýa­nyshty ha­bardy estı salysymen kúres túrle­rinen ol­ım­pıada jetkinshekterin da­ıarlaıtyn mamandandyrylǵan oblys­tyq №7 balalar men jasós­pi­rimder sport mektebine qaraı qustaı ushtyq. Mektep dırektory ári Jánibek­tiń babyna jaýapty bapkerlerdiń biri, sport sheberi Kenje Naýatov shákir­timen birge Sıngapýrde júr eken. Bizdi dırektordyń orynbasary Qonys Turarov pen Jánibektiń ákesi Jumaseıit Qandybaev qarsy aldy. Bir-birimizdi quttyqtap, qaýqyldasa amandasyp jatyrmyz. Jánibek 1993 jyly 28 jeltoq­san­da dúnıege kelipti. Grek-rım kúresinen sport sheberi. Máskeý Olımpıadasy­nyń jeńimpazy, balýan Jaqsylyq Úshke­mpirov júldesine arnalǵan ha­lyq­aralyq jarystyń jeńimpazy. Re­seıdegi aǵaı­yndy Samýrgashevtar júl­desine arnalǵan halyqaralyq jarys­tyń kúmis júldegeri. Ákesi Jumaseıit pen mektep dırektory Kenje Naýatov jáne Rysbek Nurǵazın jeke bapker­leri bolyp shyqty. Al jas balýandy Sıngapýr synyna bas bapker Serik Jumashev daıyndaǵan. Jasóspirimder arasyndaǵy Olım­pıa­danyń tuńǵysh chempıony sport­taǵy alǵashqy jolyn 2004 jyly Taraz qala­syndaǵy “Dáýlet” kásiptik sport klýby­nan bastapty. Bul mektepke ony alǵash ret sport sheberi, balýan aǵasy Nurbek jetelep aparǵan eken. Al jalpy bilimdi oblys ortalyǵyndaǵy №45 Baýyrjan Momyshuly atyndaǵy mektep-gımnazııada alyp, kúres ónerindegi babyn arttyra túsý úshin joǵary synyptardy Asta­nadaǵy Qajymuqan Muńaıtpasov atyn­daǵy sporttaǵy daryndy balalarǵa ar­nal­ǵan respýblıkalyq mektep-ınternatta bitiredi. Sóıtip týǵan qalasy Tarazǵa kelip, joǵary oqý ornyna tústi. Qazaqtyń “Bap shaba ma, baq shaba ma?” degen sózi, teginde, ras. Áıtpese, bul dúbirli dodaǵa Ábýnasyr Nyshanov degen talantty balýan barýǵa tıis eken. Olım­­pıada joldamasyn sarapqa salatyn Tash­kent týrnırinde jeńiske jetken ol, óki­nishke qaraı, Túr­kııadaǵy halyqaralyq jarysta qolyn jara­qattap alypty da, jol Jánibekke buıyrypty. Jánibek te “daıyn asqa tik qasyq” emes, el jasós­pi­rim ba­lýan­dary arasynda “ekinshi nó­mirli balýan” degen aty bar. Degenmen, ol óziniń basty básekege laıyqty ekenin Azııa chempıonyn jeńe otyryp dáleldeıdi. Sonymen qazaqstandyq jas jampoz Sıngapýr Olımpıadasynyń boz kilemin­de á degende kolýmbııalyq Karlos Valor­dy, odan keıin belarýs Aleksandr Ne­dash­kovskııdi 3:1 esebimen utty, nıkara­gýalyq qarsy­lasy Joze Gonsalesti 4:0 esebimen aıqyn jeńdi. Al aqtyq beldesýde túrik balýany Mýsa Gedıkten 3:1 esebimen aıla­syn asyrdy. Sóıtip, álemdik sport tarı­hyna alǵash ret altyn áriptermen jazylyp otyrǵan jasóspi­rim­der Olımpıadasynda chempıon atanyp, osynaý bedeldi ataqqa tuńǵyshtardyń biri bolyp qol jetkizdi. “Alyp anadan týady”. Jánibektiń anasy Rozanyń mamandyǵy – esepshi. Búginde ol óziniń kishkentaı dúkenin “ermek” etip júr. Al ákesi Jumaseıit – Almaty dene tárbıesi ınstıtýtynyń túlegi. Kezinde ol da kúresten el chempıony atanǵan sportshy. Ýyzdaı uıyǵan tatý-tátti otbasy eki ul, bir qyz tárbıelep otyr. “Ákege qarap ul óser” degen. Eki ul da Jumaseıitke tartty. – Chempıon ulyńmen sóılestiń be? – dedik biz Jumaseıitke. – Joq, – dedi ol, – jeńiske jetken kúni Kenje telefon shalyp, “Balań chempıon boldy!” dep quttyqtady. Men “Rahmet!” degenshe, telefon úzilip ketti... Jumaseıittiń júzinen qýanysh ta­­by áli basylmaǵan. Tolqyp júr. Qýa­­nyp júr. “Súıer ulyń bolsa, sen súı, súıinerge jarar ol” degen osy da. Al Zýlfııa Chınshanlo (58 kg. deıin) 225 kg. kóterip, kúmis júldege ıe boldy. Keshe bet qattalyp jat­qan­da aýyr atletıkadan 242 kg. ziltemirdi basynan asyrǵan Jazıra Japargúl (63 kg.) Olımpıada chempıony atandy. Kósemáli SÁTTIBAIULY, Taraz. Sýrette: Jas balýan Jánibek Qan­dy­baev.