Ústimizdegi jyldyń 18-20 qazany aralyǵynda Astana qalasynda alǵash ret Búkilálemdik rýhanı mádenıetiniń forýmy ótedi.

Rýhanı damý – adamzat damýynyń kilti Ústimizdegi jyldyń 18-20 qazany aralyǵynda Astana qalasynda alǵash ret Búkilálemdik rýhanı mádenıetiniń forýmy ótedi. Bul jóninde atalǵan forým komıtetiniń teń tóraǵasy, Senat depýtaty Tólegen Muhamedjanov málim etti. Jıynnyń ótýine “Álem mádenıet arqyly” halyqaralyq qaýymdastyǵy, Rýhanı kelisim kongresi, sondaı-aq elimizdiń, Reseı men Eýropanyń ózge de uıymdary atsalysýda. Senatordyń málimdeýinshe, forým óziniń bastaýyn sonaý 1990 jyldardan, ıaǵnı elimiz táýelsiz­di­gin endi alyp jatqan kezinen ala­dy. Al 1992 jyldyń 18 qazanynda Almaty qalasynda I Búkilálemdik rýhanı kelisim kongresi ótken bo­latyn. Sodan beri jyl saıyn 18 qazanda Rýhanı kelisim kúnine arnap ártúrli sharalar ótkizilip keledi. Alaıda úlken mańyzdy sha­ranyń, naqtylap aıtqanda Fo­rým­nyń ótýi 18 jyldan keıin júzege asyp otyr. Elimiz óz kúntizbesinde Rýhanı kelisim kúni dep belgilegen álemdegi tuńǵysh memleket bolyp tabylady. Forýmnyń osy kúni atalyp ótýiniń astarynda osyndaı sımvoldyq maǵyna jatyr. Onyń ótýi týraly oı 2006 jyly Astana qalasynda ótken ekstremızmge qarsy kúres, tole­rant­tylyqty nasıhattaýǵa baǵyt­talǵan halyqaralyq konferensııa barysynda jarııa etilgen-di. Atal­ǵan konferensııada álemdik qo­ǵam­dastyqqa jáne Memleket basshysy Nursultan Nazarbaevqa forýmdy ótkizý jóninde úndeý qabyldanǵan bolatyn. Bıyl naqty múmkindik týyp otyr. Osyǵan baılanysty Par­lament forýmǵa qatysa­tyn­dy­ǵy týraly sheshim shyǵardy. Úkimet tarapynan Premer-Mınıstrdiń birinshi orynbasary О́.Shókeev bastaǵan úkimettik komıssııa qu­ryl­ǵan. Áıtse de, negizgi uıymdas­ty­rýshylyq jumystar úkimettik emes uıymdar tarapynan júrgizilýde. Halyqaralyq uıymdastyrý komıteti jumys isteýde. Uıym­das­tyrý komıtetiniń sodan beri bes oty­rysy ótip, onda birqatar má­se­le­ler talqylanǵan. Forým kópshi­lik­tiń qyzyǵýshylyǵyn týǵyzǵan­dyq­­tan, arnaıy veb-saıt (www.astana forum.kz) ta ashylǵan. Qazirgi tańda beınerolık túsirilip, ol elimizdiń keıbir telearna­la­rynda kórseti­lý­de. Sonymen qatar elimizde tir­kelgen elshilikter arqyly forýmdy ótkizý barysy jónindegi jumystar jalǵasyn tabýda. Forýmnyń ashylý qarsańynda “Keshegi ulylar bizben birge” atty kórme uıymdasty­ry­la­dy, onda ár el ózderiniń bir uly tulǵasyn qoıady. Mysaly, Úndistan elshiligi M.Gandıdi, Ulybrıtanııa Ý.Shekspırdi, Reseı L.N.Tols­toıdy, ol Qazaqstan Abaıdy kór­mege qoıatyn bolady. Bul jerdegi eń basty ıdeıa adamzat damýynyń basty basymdyǵy rýhanı ósý bolýǵa tıistigin kórsetý. Asqar TURAPBAIULY.