Nemis dıplomaty Aqtóbe óńirinde boldy

Aqtóbege Germanııanyń Almatydaǵy bas konsýldyǵynyń bas konsýly Gerold Amelýng bastaǵan delegasııa keldi. Delegasııa músheleri oblys ortalyǵynda birqatar kezdesýler ótkizdi. Al bul sapardy Germanııa Syrtqy ister mınıstrligi Gete ınstıtýtymen birlesip Germanııanyń Qazaqstandaǵy jyly aıasynda uıymdastyryp otyr. Qonaqtar oblys ákimi Eleýsin Saǵyndyqovpen kezdesti, onda eki eldiń arasyndaǵy ekonomıkalyq jáne saýda baılanystary, ózara dostyq qarym-qatynastar tóńireginde rııasyz áńgime órbidi. Oblys aýmaǵynda Germanııanyń 10-ǵa jýyq kompanııasy jumys isteıdi. Olardyń qatarynda munaı-gaz uńǵylaryn barlaý jáne burǵylaý jumystaryn júrgizetin “ITAG-JE” birlesken kásiporny, ekspedıtorlyq jáne kólik qyzmetin kórsetetin “Logıstık Partners” JShS, sý, gaz jáne jylý eseptegishterin shyǵaratyn “Senner-Aqtóbe” JShS, syra, tamaq ónimderin óndiretin “Alıans Sıtı” JShS jáne basqalary bar. Bular óńir ekonomıkasyn damytýǵa ózindik úles qosyp keledi. Kezdesý kezinde olardyń qataryn alda da tolyqtyrýdyń múmkindikteri mol ekendigi atap ótildi. Ásirese, nemisterdiń qaıtara óńdelgen energııa alýdaǵy jáne basqa saladaǵy ozyq tehnologııasy qyzyqtyrady. Oblystyq ákimdikte bas konsýl Gerold Amelýng bastaǵan  delegasııa músheleri  oblystyq basqarmalar men departamentter basshylarymen jáne kásipkerlermen de  kezdesti. Onda Germanııa ınvestısııasyn oblys ekonomıkasyna tartý, ózara ekonomıkalyq baılanysty odan ári damytý, jańa ozyq tehnologııany engizý múmkindik­teri sóz boldy. Bas konsýl bul kezdesýdi bo­lashaqtaǵy irgeli isterdiń bastapqy qadamy, úlken ınvestısııalyq jobalardy  birigip ıgerýdiń  bastamasy retinde baǵalady. Aqtó­belik kásipkerler Germanııa ınvestısııa­synyń úlken óndiristik jobalarǵa áli de az tartylyp otyrǵanyna toqtaldy. Bas konsýl bastaǵan delegasııa, sondaı-aq  “Dostyq” úıinde bolyp, osyndaǵy etnıkalyq nemisterdiń “Vozrojdenııa” mádenı uıymynyń ókilderimen kezdesti. Al tústen keıin “Osy zamanǵy Germa­nııa”  jáne  “Germanııada jasalǵan qaıta óńdelgen energııa” DENA tehnologııa kóshpeli kórmeleriniń ashylýyna qatysty. “Osy zamanǵy Germanııa” kórmesine ber­lındik fotograf Torsten Elgerdiń  osy el­diń kóp qyrly qoǵamdyq, áleýmettik jáne má­denı ómirin aıshyqty kórsetken 30 sýreti qoıylǵan. Fotosýretter qazirgi Germanııa­nyń ásem tabıǵatyn, sáýleti kelisken qazirgi zamanǵy jáne tarıhı ǵımarattaryn kóz al­dyńyzǵa ákeledi. Al “Germanııada jasalǵan qaıta óńdelgen  energııa” kóshpeli kórmesine kelýshiler 24 bannerden 13 qaıta óńdelgen ener­gııa tehnologııasymen tanysa alady. Olardan jel, kún, geotermaldyq, foto­elek­tr­lik jáne basqa qýattardy alýdyń tehno­lo­gııasy jaıly keń maǵlumat alýǵa bolady. Kórme tek aqparattyq sıpatta bolyp qana qoımaı, Germanııa men Qazaqstan arasynda  osyndaı tehnologııaǵa qyzyǵýshylyq tý­ǵy­zý­ǵa yqpal etedi dep kútilýde. Kórmeniń ashylý rásiminde oblys ákiminiń orynbasary Roza Kemalova qazaqy dástúrmen bas konsýl Gerold Amelýngtiń ıyǵyna shapan japty. Satybaldy SÁÝIRBAI, Aqtóbe oblysy.